Mbunge wa Jimbo la Shinyanga Mjini, ambaye pia anahudumu kama Naibu Waziri Ofisi ya Waziri Mkuu anayeshughulikia Kazi, Vijana, Ajira na Watu Wenye Ulemavu, Mhe. Patrobas Katambi, ameanza kwa vitendo kutatua kero za wananchi kwa kuzindua rasmi mpango wa usambazaji wa umeme katika Mtaa wa Azimio, uliopo Kata ya Lubaga.
Zoezi hili lililoanza tarehe 4 Machi, 2025, ni utekelezaji wa ahadi ambayo Mhe. Katambi aliitoa kwa wananchi wakati wa mkutano wa hadhara uliofanyika siku mbili kabla. Katika mkutano huo, wananchi wa Mtaa wa Azimio walieleza kero yao kubwa ya kukosa huduma ya umeme. Mhe. Katambi aliwasikiliza na kuwahakikishia kuwa ifikapo Jumanne ya tarehe 4 Machi, nguzo za umeme zingeanza kusimikwa, ahadi ambayo sasa imeanza kutekelezwa kwa vitendo.
"Siku ya Jumapili tulipokuwa hapa kwenye mkutano wa hadhara, wananchi wa Azimio waliomba huduma ya umeme. Niliwaahidi kuwa Jumanne nguzo zitaanza kusimikwa, na leo nimerudi kuzindua rasmi usimikaji wa nguzo ili kusambaza umeme majumbani," alisema Mhe. Katambi kwa furaha.
Alisisitiza kuwa serikali inayoongozwa na Rais Dk. Samia Suluhu Hassan imejidhatiti katika kutekeleza ahadi zake kwa wananchi kwa vitendo. Hivyo, aliwataka wananchi kuendelea kuiunga mkono serikali katika juhudi zake za kuleta maendeleo na kuendelea kukiamini Chama Cha Mapinduzi (CCM), kwani chama hicho kinafanya kazi kwa maslahi yao.
Viongozi mbalimbali na wananchi wa eneo hilo walionyesha kufurahishwa na hatua hiyo. Mwenyekiti wa CCM Wilaya ya Shinyanga Mjini, Bw. Anord Makombe, alisema kuwa hakuamini kama Mhe. Katambi angeweza kutimiza ahadi hiyo kwa haraka kiasi hicho, lakini sasa ameshuhudia kwa macho yake. "Namsihi aendelee kuchapa kazi na kuwatumikia wananchi kwa moyo huu," aliongeza Bw. Makombe.
Diwani wa Kata ya Lubaga, Mhe. Ruben Dotto, naye alimshukuru Mhe. Katambi kwa kutekeleza ahadi yake kwa vitendo na kuhakikisha kuwa wananchi wa Mtaa wa Azimio wanapata huduma ya umeme ambayo wamekuwa wakiisubiri kwa muda mrefu.
Kwa upande wake, Kaimu Meneja wa Shirika la Umeme Tanzania (TANESCO) Mkoa wa Shinyanga, Mhandisi Anthony Tarimo, alifafanua kuwa katika mwaka wa fedha 2024/2025, serikali imetenga kiasi cha Shilingi za Kitanzania bilioni 1.2 (TZS 1,200,000,000) kwa ajili ya kusambaza umeme katika maeneo mbalimbali ya Manispaa ya Shinyanga ambayo hayakuwa na huduma hiyo.
Alieleza kuwa kwa ajili ya Mtaa wa Azimio pekee, serikali imetenga kiasi cha Shilingi milioni 61 za Kitanzania (TZS 61,000,000) kwa ajili ya mradi huo. Hatua ya kwanza katika mradi huo ni usimikaji wa nguzo za umeme. "Tunamshukuru Mheshimiwa Katambi kwa kushirikiana nasi katika kuhakikisha wananchi wanapata umeme kwa wakati," alisema Mhandisi Tarimo.
Wananchi wa Mtaa wa Azimio walionyesha furaha isiyoelezeka kwa kuona kuwa kilio chao kimesikilizwa na utekelezaji wa ahadi umeanza mara moja. "Tumeteseka muda mrefu bila umeme, lakini sasa tunafarijika kuona nguzo zinaanza kusimikwa. Tunamshukuru Mbunge wetu kwa kutimiza ahadi yake kwa vitendo," alisema mmoja wa wakazi wa mtaa huo kwa bashasha.
Hatua hii muhimu ya usambazaji wa umeme inatarajiwa kuleta mabadiliko chanya katika maisha ya wakazi wa eneo hilo, kuongeza fursa za kiuchumi kwa kuwezesha biashara ndogondogo na za kati kukua, na kwa ujumla kuimarisha maendeleo ya jamii.