Wakati Tanzania ikielekea katika Uchaguzi Mkuu uliopangwa kufanyika Oktoba 29, 2025, mhimili wa Mahakama umepewa onyo kali la kuhakikisha unajipanga kikamilifu kutekeleza jukumu lake la kikatiba kwa weledi wa hali ya juu. Jaji Kiongozi wa Mahakama Kuu, Dk. Mustapher Mohamed Siyani, ametoa agizo zito kwa Majaji wote nchini, akiwataka kushughulikia migogoro yote ya uchaguzi itakayoletwa mbele yao kwa kuzingatia haki na usawa, ili kujenga na kuimarisha imani iliyopotea kwa sehemu ya jamii.
Akitoa nasaha zake wakati wa ufunguzi wa mafunzo maalum kwa Majaji kuhusu namna bora ya kuendesha mashauri ya uchaguzi, Dk. Siyani alikiri waziwazi kuwepo kwa malalamiko kutoka kwa umma dhidi ya taasisi za serikali, ikiwemo Mahakama. Alisema hali hii inachafua taswira ya utoaji haki nchini na kusisitiza kuwa Uchaguzi Mkuu ujao ni fursa ya kipekee kwa Mahakama kuthibitisha kuwa ndicho kimbilio la mwisho la mnyonge.
"Tuna jukumu la msingi la kuhakikisha kuwa kila uamuzi unaotolewa kwenye kesi za uchaguzi unalenga kurejesha matumaini ya wananchi kwa mhimili huu. Tunapokea malalamiko mengi, na njia pekee ya kuyajibu ni kwa vitendo, kwa kutoa maamuzi ya haki yasiyotiliwa shaka," alisisitiza Jaji Kiongozi.
Alikumbusha kuwa kwa mujibu wa Ibara ya 107A ya Katiba ya Jamhuri ya Muungano wa Tanzania, Mahakama ndiyo yenye mamlaka ya mwisho katika utoaji haki. Hivyo, jukumu la kusimamia haki wakati na baada ya mchakato wa uchaguzi wa Rais, Wabunge, na Madiwani haliwezi kuepukika. Aliwataka Majaji kutumia mafunzo hayo kunoa weledi wao ili wawe tayari kukabiliana na changamoto zozote zitakazojitokeza, wakitanguliza sheria na maslahi ya taifa mbele. Wito huu unakuja wakati ambapo macho na masikio ya Watanzania yataelekezwa mahakamani kusubiri tafsiri ya sheria pale ambapo kutatokea sintofahamu za kisiasa.