Chama cha Ukombozi wa Umma (CHAUMMA), kupitia mgombea wake wa urais, Salumu Mwalimu, kimeibuka na sera mpya yenye ushawishi mkubwa kwa vijana, ambapo ameahidi kuunda Baraza la Mawaziri litakaloundwa na vijana kuanzia umri wa miaka 35 endapo chama chake kitaingia madarakani. Msimamo huu unakuja kinyume na utamaduni uliopo wa kuteua wazee kwenye nyadhifa za juu za uongozi.
Akizungumza kwenye mkutano wa hadhara, Mwalimu alisisitiza kuwa vijana wana uwezo mkubwa wa kufikiri na kuchukua hatua kwa haraka, jambo ambalo ni muhimu katika kuleta mabadiliko chanya na maendeleo ya nchi. "Huwezi kutegemea ubunifu na maendeleo ya haraka kutoka kwa Baraza la Mawaziri lenye umri wa miaka 60 au 70," alisema Salumu Mwalimu, akionyesha jinsi umri mkubwa unavyoweza kuathiri kasi ya utendaji.
Mwalimu alifafanua kuwa lengo la CHAUMMA ni kuvunja kasumba ya kutegemea wazee pekee katika nafasi za kiutendaji na badala yake kuwaweka vijana wenye uwezo wa kufikiri nje ya boksi na kutekeleza majukumu yao kwa ufanisi. Alisema vijana ni rasilimali muhimu kwa taifa na wanapaswa kupewa fursa za kuongoza na kuleta mabadiliko wanayoyaota.
Sera hii inaonekana kulenga moja kwa moja kundi kubwa la vijana nchini Tanzania, ambao wanazidi kuongezeka na wanatafuta fursa za ajira na ushiriki katika siasa. Ahadi ya kuwatengenezea nafasi kubwa za uongozi inaweza kuwavutia wengi wao na kuongeza kasi ya ushawishi wa CHAUMMA katika Uchaguzi Mkuu wa mwaka 2025. Hata hivyo, baadhi ya wachambuzi wanajiuliza iwapo vijana hao wataweza kuhimili mikikimikiki ya siasa za Urais na uongozi wa kitaifa.
Msimamo huu wa Salumu Mwalimu unaweza kuleta mjadala mpya nchini kuhusu uongozi wa vijana na wazee, na jinsi umri unavyoweza au usiweze kuwa kigezo cha uongozi. Wakati nchi nyingi duniani zikiongozwa na vijana, wazo la Mwalimu linaweza kuwa na mwangwi mkubwa kwa vijana wanaotamani kuona mabadiliko katika utawala na uongozi.