Katibu Mkuu wa Chama cha Ukombozi wa Umma (CHAUMMA), Ndugu Salum Mwalimu, ametoa wito mzito kwa viongozi na taasisi zote zenye jukumu la kusimamia amani nchini, kwamba watumie nafasi hiyo hiyo kuhakikisha kunakuwa na haki kamili katika Uchaguzi Mkuu unaotarajiwa kufanyika mwaka huu. Amewasisitiza wale wenye mamlaka ya kusimamia mchakato mzima wa uchaguzi kuhakikisha unakuwa huru, wa haki, na wenye kuaminika ili kuepusha sintofahamu zozote.
Salum Mwalimu aliyasema haya akiwa ameungana na waumini wa dini ya Kiislamu katika Msikiti wa Bakwata-Masjid Noor, ulioko Bariadi, mkoani Simiyu, wakati wa kuswali Swala ya Eid. "Tutaihubiri amani, lakini pia tutaihubiri na haki kwa wale wote wanaohusika na usimamizi wa uchaguzi," alisisitiza Mwalimu. Alifafanua kuwa lengo ni kuhakikisha uchaguzi unakamilika kwa njia nzuri, na kuacha Watanzania wakiwa wamoja na tayari kuendeleza gurudumu la maendeleo ya taifa.
Aidha, Mwalimu aliwaomba wananchi kujitokeza kwa wingi na kushiriki kikamilifu katika uchaguzi huo, iwe kwa kugombea nafasi mbalimbali za uongozi au kwa kupiga kura. "Chagueni viongozi watakaosimamia maendeleo yenu," alisema Mwalimu, akiwahimiza wananchi kutojiweka nyuma bali kujitokeza na kutumia fursa hiyo muhimu ya kidemokrasia.
Kwa upande wake, Sheikh wa Mkoa wa Simiyu, Issa Kwezi, aliwahimiza Watanzania wote kutokubali kutumika kwa namna yoyote ile kuchafua au kuharibu amani iliyopo nchini. Sheikh Kwezi alionyesha masikitiko yake kuwa, mara nyingi viongozi wa dini wanaposisitiza umuhimu wa amani, huonekana kana kwamba wanaegemea upande fulani wa kisiasa. Hata hivyo, alikumbusha kuwa amani inapoharibika, hakuna mtu yeyote atakayesalimika, bila kujali msimamo wake. "Amani ikishaondoka, kila mmoja atabaki analia na kuilaumu nafsi yake," alionya Sheikh Kwezi, akisisitiza kuwa amani ni msingi wa kila kitu na inapaswa kulindwa kwa gharama yoyote.