Chama Cha Mapinduzi (CCM) kimetoa tathmini ya kampeni zake za urais, kikieleza kuwa kimewafikia mamilioni ya Watanzania, jambo linaloashiria kukubalika kwa mgombea wake, Dkt. Samia Suluhu Hassan. Kwa mujibu wa chama hicho, zaidi ya watu milioni 14.62 wamehudhuria moja kwa moja mikutano 77 iliyofanyika katika mikoa 21, huku wengine milioni 31.6 wakifuatilia kupitia vyombo vya habari na majukwaa ya kidijitali.
Akitoa tathmini hiyo leo, Oktoba 5, 2025, Katibu wa Itikadi, Uenezi na Mafunzo wa CCM, Kenan Kihongosi, alisema mwitikio huo mkubwa si wa bahati mbaya. Alisema umetokana na imani thabiti ambayo wananchi wameiweka kwa Dkt. Samia, ikichochewa na utendaji wake wenye mafanikio makubwa katika kipindi cha miaka minne aliyoiongoza nchi.
Kihongosi alieleza kuwa mafanikio hayo yanaonekana wazi kupitia utekelezaji wa miradi mikubwa ya kimkakati. Alitolea mfano wa Bwawa la Kufua Umeme la Julius Nyerere (JNHPP), ambalo Dkt. Samia alilipokea likiwa na maendeleo ya asilimia 37 na sasa limefikia asilimia 99.55. Aliitaja pia Reli ya Kisasa (SGR) ambayo sasa inafanya kazi kati ya Dar es Salaam na Dodoma, pamoja na Daraja la Magufuli (Busisi) linalobadilisha sura ya usafiri Kanda ya Ziwa.
Katika sekta ya usafiri, Kihongosi alibainisha kuwa serikali ya Dkt. Samia imefufua Shirika la Ndege Tanzania (ATCL) kwa kununua ndege mpya sita za abiria na moja ya mizigo, na hivyo kufikisha jumla ya ndege 16. Vilevile, vivuko vipya sita vimeanza kazi katika Ziwa Victoria, pamoja na boti maalum ya wagonjwa (Ambulance boat) ili kuokoa maisha.
Kwenye huduma za jamii, Kihongosi alisisitiza kuwa miradi 1,633 ya maji imekamilika nchi nzima, ambapo 1,335 ni ya maeneo ya vijijini pekee. Alitaja miradi mahususi kama ule wa Ziwa Victoria unaohudumia wakazi 86,980 wa Tinde na Shelui, na chanzo kipya cha maji Butimba kinachonufaisha watu 450,000 jijini Mwanza. Katika sekta ya mifugo, serikali imetoa Shilingi bilioni 62 kwa ajili ya chanjo, kuonyesha dhamira ya kusaidia wafugaji. Kihongosi alihitimisha kwa kusema kuwa haya ni baadhi tu ya mafanikio, na Dkt. Samia bado ana mipango mingi zaidi kwa ajili ya maendeleo ya Watanzania.