Katibu wa Halmashauri Kuu (NEC) wa Chama Cha Mapinduzi (CCM), anayeshughulikia Itikadi, Uenezi na Mafunzo, CPA Amos Makalla, amesisitiza kuwa Uchaguzi Mkuu wa mwaka huu utafanyika kwa kufuata katiba na sheria zote za nchi, akiongeza kuwa mabadiliko muhimu tayari yamefanyika ili kuhakikisha uchaguzi unakuwa huru na wa haki.
Makalla aliyasema hayo tarehe 4 Machi 2025, wakati alipokuwa akizungumza na viongozi wa chama na jumuiya zao katika ngazi za shina, tawi, kata, na wilaya, kwenye mkutano uliofanyika Wilaya ya Kinondoni, jijini Dar es Salaam. Ziara hii ni sehemu ya mikutano yake ya siku tano mfululizo katika mkoa huo, ambayo inalenga kuimarisha chama na kujiandaa kwa uchaguzi mkuu.
Akiwakosoa vikali baadhi ya makundi ya upinzani ambayo yanapanga kuzuia uchaguzi kupitia maandamano, Makalla alisema juhudi hizo hazitakuwa na mafanikio yoyote. Alidai kuwa amepata taarifa za mipango ya baadhi ya makundi ya upinzani kuchangisha fedha kwa ajili ya kuandaa "nguvu ya umma" ili kuzuia uchaguzi. Alionya kuwa fedha hizo zitapotea bure, kwani uchaguzi utafanyika kwa mujibu wa sheria za nchi.
"Nimeona kwenye magroup yao wakihamasishana kuchangiana ili waende kwenye nguvu ya umma kuzuia uchaguzi. Hela zitaliwa tu, lakini uchaguzi utafanyika kwa mujibu wa sheria," alisisitiza Makalla.
Pia, alionya kuwa ikiwa Chama cha Demokrasia na Maendeleo (CHADEMA) kitaendelea kushikilia msimamo wake wa kutoshiriki uchaguzi, kitapoteza nafasi yake kama chama kikuu cha upinzani nchini. Alidai kuwa kiongozi wa chama hicho, Tundu Lissu, anaelekea kuingia katika historia ya kukiharibu chama hicho. Alisema kuwa CHADEMA kilikuwa na nafasi ya kupata madiwani na wabunge wengi, lakini msimamo wao wa kutoshiriki uchaguzi utawazuia wanachama wake kugombea na hivyo kudhoofisha upinzani.
"Lissu anaingia katika historia ya kuiua Chadema. Chama hicho kilikuwa na nafasi ya kupata madiwani na wabunge, lakini msimamo huu utazuia wanachama wake kugombea na hivyo kudhoofisha upinzani," alionya Makalla.
Makalla alisisitiza kuwa busara ingekuwa kwa vyama vya upinzani kushiriki uchaguzi na baadaye kujadiliana kuhusu mabadiliko ya sheria, badala ya kujitenga na mchakato wa kidemokrasia. Alisema kuwa kujitenga na uchaguzi ni sawa na kujinyima haki ya kushiriki katika kuamua mustakabali wa nchi.
Kuhusu mchakato wa mabadiliko ya sheria za uchaguzi, Makalla alieleza kuwa Rais Samia Suluhu Hassan alisikiliza maoni ya wadau mbalimbali na kuunda kikosi kazi chini ya uenyekiti wa Profesa Rwekaza Mukandala ili kupitia na kupendekeza mabadiliko ya mfumo wa uchaguzi. Alisema kuwa vyama vyote vya siasa vilihusika kutoa maoni, isipokuwa CHADEMA, ambacho kilitaka kusikilizwa peke yake. Hata hivyo, alisisitiza kuwa maoni ya wadau wote yalikusanywa, muswada wa sheria ukaandaliwa, na kuwasilishwa bungeni.
"Vyama vyote vilihusika kutoa maoni isipokuwa Chadema, ambacho kilitaka kusikilizwa peke yao. Lakini hata hivyo, maoni yalikusanwa, muswada wa sheria uliandaliwa na kuwasilishwa bungeni," aliongeza Makalla.
Mchakato huo ulizaa sheria mbili muhimu, ikiwemo sheria mpya ya Tume Huru ya Uchaguzi. Sheria hiyo inaweka mfumo wa uteuzi wa wajumbe wa tume kwa kushirikisha kamati ya usaili itakayoongozwa na Jaji Mkuu wa Tanzania na Zanzibar. Rais hatakuwa na mamlaka ya kubadilisha au kuteua wajumbe wa tume bila maamuzi ya kamati hiyo.
Makalla alihitimisha kwa kusisitiza kuwa mfumo wa uchaguzi umeimarishwa na uchaguzi wa mwaka huu utafuata taratibu zote za kisheria. Alisisitiza kuwa hakuna mtu au kikundi chochote kitakachoweza kuzuia uchaguzi kufanyika.