Wakati zikiwa zimesalia siku chache kuelekea Uchaguzi Mkuu wa kihistoria wa Oktoba 29, Chama Cha Mapinduzi (CCM) Mkoa wa Pwani kimepeleka salamu nzito katika kisiwa cha Mafia, kikisisitiza kuwa uzoefu mkubwa alionao mgombea wake wa urais, Dkt. Samia Suluhu Hassan, ndiyo silaha kuu itakayowapa ushindi wa kishindo.
Akizungumza kwa mamlaka mbele ya Umoja wa Vijana wa chama hicho (UVCCM) wilayani humo, Mjumbe wa Kamati ya Siasa ya Mkoa, Dkt. Chakou Tindwa, alisema Watanzania hawapaswi kufanya makosa ya kumchagua kiongozi asiye na uzoefu wa kuongoza nchi. Alieleza kuwa safari ya uongozi ya Dkt. Samia—kuanzia kuwa mbunge, waziri, Makamu wa Rais, na hatimaye Rais—inamfanya awe na sifa za kipekee za kuendelea kuliongoza taifa kwa miaka mingine mitano. "Rais Samia amepitia ngazi zote muhimu za uongozi. Amedhihirisha uwezo wake. Hali kadhalika mgombea mwenza wake, Dk. Emmanuel Nchimbi, alianza uongozi tangu akiwa chipukizi. Hii ni timu ya uhakika itakayolipeleka taifa letu mbele," alisisitiza Dkt. Tindwa.
Alienda mbali zaidi na kueleza kuwa uongozi wa Dkt. Samia sio wa maneno matupu, bali umejikita katika vitendo. Alitaja jinsi serikali yake ilivyofanikiwa kukamilisha miradi mikubwa ya kimkakati iliyoachwa na mtangulizi wake, Hayati Dkt. John Magufuli, ikiwemo ujenzi wa Bwawa la Umeme la Mwalimu Nyerere, Reli ya Kisasa (SGR), na Daraja la Kigongo-Busisi. "Hii inaonyesha ukomavu na dhamira ya kweli ya kuwatumikia wananchi," aliongeza.
Viongozi wa CCM Wilaya ya Mafia nao waliunga mkono hoja hiyo, wakitoa ushahidi wa jinsi kisiwa chao kilivyobadilika kimaendeleo chini ya uongozi wa Dkt. Samia. Mwenyekiti wa CCM wa Wilaya, Mohamed Faki, alifichua kuwa katika kipindi cha miaka minne tu, serikali imemwaga zaidi ya Shilingi Bilioni 60 kwa ajili ya miradi ya maendeleo wilayani humo, ikiwemo ujenzi wa barabara, madarasa, na kuboresha upatikanaji wa maji na huduma za afya.
Kwa upande wao, vijana kupitia kwa Mwenyekiti wao, Amina Khatibu, walitamba kuwa wamejipanga kikamilifu kuhakikisha ushindi unapatikana ili miradi yenye tija kwao, iendelee kutekelezwa.