Naibu Waziri Mkuu na Waziri wa Nishati, Dkt. Doto Biteko, ametoa wito kwa taasisi zote nchini, za umma na binafsi, kuimarisha mifumo ya ufuatiliaji na tathmini. Akizungumza katika hafla ya kufunga kongamano la Ufuatiliaji, Tathmini, na Kujifunza (MEL) jijini Mwanza, Dkt. Biteko alisisitiza kuwa taasisi isiyofanya tathmini ni sawa na timu ya mpira inayocheza bila mwamuzi. Alisema taasisi zinazopuuza tathmini hujikuta zikishangazwa na matokeo mabaya, badala ya kuwa tayari kuyakabili kwa suluhisho za mapema.
"Mtu anayefanya tathmini vizuri, hata matatizo yakitokea, yataathiri kwa kiasi kidogo kwa sababu tayari alishayaona mapema na alikuwa na majibu mkononi," alieleza Dkt. Biteko, akiongeza kuwa Serikali ina wajibu wa kuasisi utamaduni wa tathmini bila upendeleo. Alibainisha kuwa mfumo huu wa uwazi unatoa fursa ya kutabiri na kujiandaa na changamoto zinazoweza kutokea, hivyo kupunguza athari zake. Alisisitiza kuwa wanahitaji kusikia ukweli, siyo habari njema peke yake, ili kuweka misingi imara ya maendeleo.
Vilevile, Dkt. Biteko aliwataka wataalamu wa tathmini nchini kuendelea kuwa waadilifu katika kazi zao, kuonyesha mapungufu bila woga, na kutangaza mafanikio kwa sauti kubwa ili wananchi waone thamani ya Serikali yao. Aliongeza kuwa mtu yeyote anayejaribu kuzuia kazi za tathmini anajua anachokifanya na kwamba Serikali haitasita kuchukua hatua dhidi ya wazembe. "Tunataka wananchi wajue kwamba Serikali yao inafanya kazi kwa uwazi na usahihi," alisisitiza.
Kauli yake iliungwa mkono na Naibu Waziri wa Nchi, Ofisi ya Rais (Mipango na Uwekezaji), Stanslaus Nyongo, ambaye alieleza kuwa ingawa tathmini inaweza kuonekana kuwa na gharama, gharama ya kutokufanya tathmini ni kubwa zaidi kwa taasisi na taifa kwa ujumla. Alieleza kuwa ufuatiliaji na tathmini huwezesha kubaini changamoto za kiutendaji mapema, kufanya marekebisho stahiki, na kuongeza uwajibikaji miongoni mwa watendaji.
Kongamano hilo, ambalo lilimshirikisha wawakilishi kutoka nchi mbalimbali kama vile Afrika Kusini, Kenya, Uganda, na Ujerumani, lililenga kubadilishana uzoefu na kujifunza mbinu mpya za ufuatiliaji na tathmini. Dkt. James Kilabuko, Naibu Katibu Mkuu, Ofisi ya Waziri Mkuu (Sera, Bunge na Uratibu), aliyemwakilisha Katibu Mkuu, alieleza kuwa ushiriki huo wa kimataifa uliwezesha washiriki kujifunza kupitia mada mbalimbali, mijadala ya kitaalamu, na maonyesho.