Wakati joto la kisiasa likianza kupanda nchini kuelekea chaguzi zijazo, Rais Samia Suluhu Hassan ametoa onyo kali na kutuma ujumbe mzito kwa Watanzania, akisisitiza kuwa amani ya nchi ni muhimu kuliko maslahi ya kisiasa ya mtu yeyote au kikundi chochote. Akizungumza jijini Dar es Salaam wakati wa Kongamano la Amani lililoandaliwa na Umoja wa Maimamu Tanzania (UMATA), Rais Samia alifichua kuwepo kwa viashiria na njama za kuvuruga utulivu wa nchi katika kipindi hiki muhimu.
Alieleza kuwa, kwa kawaida, vipindi vya uchaguzi duniani kote huleta msisimko wa kisiasa, lakini kwa Tanzania, ni kipindi cha kudumisha utamaduni wa amani uliodumu kwa miongo. Alionya kuwa kuna makundi mawili hatari yanayoweza kutumia uchaguzi kama mwanya wa kuzua ghasia. Kundi la kwanza ni lile la nje ya nchi, ambalo alidai linatamani kuona Tanzania inachafuliwa ili wapate fursa ya kuingilia mambo ya ndani, kunufaika na rasilimali, au hata kuweka viongozi vibaraka wasio na uzalendo.
Kundi la pili, kwa mujibu wa Rais, ni la ndani ya nchi. Hili linajumuisha wanasiasa wenye uchu mkubwa wa madaraka ambao, wanapokosa fursa za uongozi, huanza kuhoji na kutafuta njia za kuzua chuki na migogoro. "Upendo wa madaraka unapozidi upendo wa kupendana, lazima kuwe na matatizo," Rais Samia alisisitiza, akiwataka wale wanaokosa nafasi za uongozi kumshukuru Mungu na kujipanga kwa wakati mwingine, akisema hiyo ndiyo sifa ya mtu mwenye imani ya kweli.
Katika muktadha huo, Rais Samia aliwaomba viongozi wa dini nchini kote kusimama imara katika jukumu lao la kulea jamii kiroho na kimaadili. Aliwataka wahubiri na kufundisha umuhimu wa imani, ambayo ndiyo chimbuko la amani ya kweli. Alisema kiongozi wa kweli wa dini hawezi kuchochea fujo, na wachache wanaofanya hivyo wanatumia tu mwamvuli wa dini kwa maslahi yao binafsi.
Pongezi kwa serikali zilitolewa pia katika kongamano hilo. Sheikh Mussa Kundecha, mmoja wa viongozi wa Kiislamu, alimshukuru Rais Samia kwa hatua ya kihistoria ya serikali yake ya kurasimisha masomo ya dini katika mtaala mpya wa elimu. Alisema hatua hiyo ni jibu la kilio cha muda mrefu kuhusu mmomonyoko wa maadili na itasaidia kujenga kizazi chenye hofu ya Mungu na maadili mema, huku ikifungua fursa za ajira kwa walimu wa masomo ya dini.