Kampuni ya EssilorLuxottica, wamiliki wa chapa maarufu ya miwani ya Ray-Ban, wametangaza mipango kabambe ya kuongeza uzalishaji wa Miwani Mahiri ya Meta Ray-Ban hadi kufikia Milioni 10 ifikapo mwisho wa mwaka. Zaidi ya hayo, wana utabiri mzito kwamba katika siku za usoni, miwani hii ya kiteknolojia itakuwa chombo kikuu cha maisha ya watu na hatimaye kuzipita simu za mkononi kwa umuhimu.
Katika mahojiano ya hivi karibuni kwenye podikasti nchini Italia, Francesco Milleri, Mkurugenzi Mtendaji wa EssilorLuxottica, alionyesha matumaini makubwa kuhusu kuongezeka kwa mahitaji ya miwani mahiri. Alisema kuwa miwani, ambayo kwa muda mrefu ilionekana kama kifaa kisaidizi au sasa kama vazi la urembo (fashion accessory), ina uwezo wa kuwa kifaa cha msingi katika maisha ya binadamu na kuchukua nafasi ya simu. Alitabiri kuwa katika miaka michache ijayo, mamia ya mamilioni ya miwani mahiri itaunganishwa, na kuunda jamii kubwa ya watumiaji.
Taarifa hii inakuja baada ya EssilorLuxottica kutoa ripoti ya kifedha mwezi Julai, ikionyesha kwamba mauzo ya Ray-Ban yaliongezeka zaidi ya mara tatu (3) kwa mwaka, na mauzo ya nusu ya kwanza ya mwaka yaliongezeka zaidi ya mara tatu ikilinganishwa na mwaka uliopita.
Japo hawakufichua idadi kamili, taarifa zilizopo zinaonesha kuwa Miwani ya Meta Ray-Ban iliuza takribani milioni 1 mwaka jana.
Hapo awali, Mark Zuckerberg, Mkurugenzi Mtendaji wa Meta, alibainisha katika mkutano wa ndani wa kampuni mapema mwaka huu kwamba, 2025 utakuwa mwaka wa kuamua kama mauzo ya miwani hiyo yataongezeka kutoka milioni 1 hadi kati ya milioni 2 au hata kufikia milioni 5. Ikichukuliwa kwa pamoja, utabiri wa Milleri wa kufikia milioni 10 unaonyesha matumaini makubwa, mara mbili ya matarajio ya awali ya Meta kwa mwaka huu.
Jambo la kufurahisha ni kwamba, toleo jipya la miwani yenye skrini ya kuonyeshea picha ndani ya lenzi (first display glasses) lililozinduliwa mwezi uliopita katika hafla ya Connect, limepokelewa vizuri sana. Kulingana na wachambuzi, bei ya takribani Shilingi Milioni 2.9 (Dola za Kimarekani 799) haiwapi shida wanaoanza kutumia teknolojia hii (early adopters). Kinachosisimua zaidi ni uwezo wa miwani hiyo kuwa na skrini ndogo ndani ya lenzi kwa mara ya kwanza, na kuruhusu matumizi mbalimbali.
Milleri alisisitiza kuwa miwani mahiri ndio mustakabali wa kampuni yake na kwamba uzalishaji wa Meta Ray-Ban utaharakisha mipango ya EssilorLuxottica kuingia katika sekta ya huduma za afya. Hii inajumuisha miwani ya Nuance Audio ambayo ina uwezo wa kusaidia usikivu (hearing aids).
Milleri alitabiri kuwa teknolojia, kidijitali, na akili ya hali ya juu (superintelligence) itawawezesha watu kuingiliana na ulimwengu uliounganishwa. Alionya kwamba Wearable Computing (vifaa vinavyovaliwa) vitaenea katika nyanja nyingi ikiwemo: jamii, afya, uendeshaji wa nyumba (home automation), burudani, uendeshaji magari bila dereva, na hata usimamizi wa hali ya hewa, mwanga, na ubora wa sauti. Zuckerberg pia aliunga mkono utabiri huo, akisema mwezi Machi kwamba "Kufikia mwaka 2030, watu wataitumia simu yao mfukoni kwa muda mrefu zaidi."