Makundi ya wadukuzi wa kimtandao yanayohusishwa na serikali ya China yameanzisha kampeni mpya ya mashambulizi, yakilenga sekta muhimu ya uzalishaji wa chipu za kompyuta (semiconductors) nchini Taiwan, ambayo ni kiini cha uzalishaji wa chipu za Akili Mnemba (AI) duniani.
Kwa mujibu wa ripoti mpya kutoka kwa kampuni ya usalama wa kimtandao ya Proofpoint, mashambulizi haya yameongezeka kwa kasi kubwa hasa kati ya miezi ya Machi na Juni mwaka huu. Hii ni mara tu baada ya serikali ya Marekani kutangaza vikwazo vipya mwezi Mei, vinavyozuia uuzaji wa teknolojia muhimu za Marekani, ikiwemo programu za usanifu wa chipu na vifaa vingine, kwenda nchini China.
Wataalamu wanaeleza kuwa vikwazo hivi vimeifanya China iwe na wakati mgumu kupata chipu maalum za AI zijulikanazo kama GPU (Graphics Processing Unit), ambazo ni muhimu sana katika kuendesha mifumo ya kisasa ya akili mnemba. Kwa kuwa Taiwan ndiyo "kiwanda cha dunia" cha chipu hizi, kupitia makampuni makubwa kama TSMC na Foxconn, inaonekana China sasa inatumia njia za udukuzi kujaribu kupata teknolojia hiyo.
Watafiti wa Proofpoint walisema, "Hili ni shabaha jipya ambalo hatujawahi kuliona likilengwa kwa kiwango hiki hapo awali." Wamebaini kuwa takriban makundi matatu tofauti ya wadukuzi yanayofungamana na China yamehusika na kampeni hizi.
Mashambulizi hayo hayakulenga tu makampuni makubwa ya teknolojia, bali pia kampuni ndogo na za kati katika mnyororo wa ugavi wa semikondakta, pamoja na taasisi za kifedha zinazochambua sekta hiyo. Ripoti inaonyesha kuwa jumla ya taasisi 15 hadi 20, ikiwemo benki moja ya kimataifa yenye makao yake makuu nchini Marekani, zimekumbwa na wimbi hili la mashambulizi. Hata hivyo, majina maalum ya makampuni yaliyoathirika na kiwango cha hasara bado havijawekwa wazi.
Akijibu tuhuma hizi, msemaji wa ubalozi wa China mjini Washington aliliambia shirika la habari la Reuters kwamba "mashambulizi ya kimtandao ni hatari ya pamoja inayozikabili nchi zote, ikiwemo China," na kusisitiza kuwa nchi yake "inapinga vikali aina zote za uhalifu wa kimtandao."