Maisha yalisimama kote nchini Ufaransa siku ya Alhamisi, tarehe 18, huku waandamanaji wakifunga barabara na kusababisha mkwamo mkubwa wa usafiri, hasa katika jiji kuu la Paris. Hatua hiyo ilikuwa ni sehemu ya maandamano makubwa ya nchi nzima kupinga serikali ya Rais Emmanuel Macron na kile wanachokitaja kama hujuma dhidi ya huduma za umma zinazotegemeza mfumo wa maisha wa nchi hiyo.
Tangu alfajiri, hali ilikuwa ya wasiwasi huku polisi wakitumia mabomu ya machozi kujaribu kuwatawanya waandamanaji, na kusababisha mapigano makali kati ya pande hizo mbili. Mamia kwa maelfu ya watu walijitokeza katika miji mikubwa na midogo, wakielezea hasira zao dhidi ya kuongezeka kwa umaskini, pengo kubwa la usawa, na changamoto za wafanyakazi wa kipato cha chini kumudu gharama za maisha.
Nadia Belloum, mfanyakazi wa sekta ya usafirishaji aliyeshiriki kwenye mgomo huo, alielezea hisia za wengi akisema, "Tunaiambia serikali 'hapana'. Tumeshavumilia vya kutosha. Hakuna pesa, na gharama za maisha ziko juu mno. Watu wanateseka, wanakamuliwa ilhali hawana chochote kilichobaki."
Vyama vya wafanyakazi, vilivyoitisha mgomo huo, vinatoa shinikizo kwa serikali kufuta mipango yake ya kupunguza bajeti, kusitisha nyongeza ya ustawi wa jamii, na kuondoa sera nyingine za kubana matumizi. Vinasema kuwa sera hizi zinawaumiza zaidi wafanyakazi wa kipato cha chini na cha kati na vilionya kuwa serikali zilizopita zilizojaribu kufuata njia kama hiyo zilianguka.
Wapinzani wa uongozi wa Macron, ambao unaonekana kupendelea wafanyabiashara wakubwa, wanalalamika kuwa mfumo wa hifadhi ya jamii wa Ufaransa unadhoofishwa. Mfumo huu unajumuisha huduma muhimu kama elimu ya bure, hospitali za umma, bima ya afya inayofadhiliwa na serikali, pamoja na mafao kwa wasio na ajira. Vyama vya mrengo wa kushoto na wafuasi wao wanashikilia msimamo kwamba njia sahihi ya kuziba pengo la kifedha la nchi na kupunguza deni siyo kukata matumizi, bali ni kuwafanya matajiri na mashirika makubwa kulipa kodi zaidi.
Maandamano haya yanalenga pia kumuwekea shinikizo Waziri Mkuu mpya, Sébastien Lecornu. Rais Macron alimteua Lecornu wiki iliyopita akimpa jukumu la kutafuta uungwaji mkono bungeni kwa ajili ya sera hizo za kubana matumizi.
Hata hivyo, kwa wengi, mabadiliko ya kiongozi hayana maana. "Kubadilisha Waziri Mkuu hakutabadilisha chochote," alisema Juliette Martin, mwanafunzi mwenye umri wa miaka 22. "Tunataka sauti zetu zisikilizwe. Hakuna mwanasiasa anayewakilisha kizazi chetu. Kizazi chetu ndicho kinachobeba mzigo wa wasiwasi na madeni kila wakati."