Rais wa Marekani, Donald Trump, amesema kwamba Rais wa Ukraine, Volodymyr Zelensky, si lazima awe sehemu ya mazungumzo ya kumaliza mgogoro kati ya nchi yake na Urusi.
Akizungumza na Redio ya Fox News, Trump alisema kuwa Zelensky amekuwa akihusika kwenye majadiliano kwa miaka mitatu tangu Urusi ilipoivamia Ukraine mnamo Februari 2022, lakini bado hajafanikiwa kuleta suluhisho la mgogoro huo.
"Kusema kweli, sidhani kama kuna umuhimu sana kwake kuwa kwenye mazungumzo," Trump alisema.
Kauli yake imekuja baada ya Zelensky kulalamika kuwa hakualikwa kushiriki mazungumzo yaliyofanyika Riyadh, Saudi Arabia. Trump alieleza kuwa kutokuwepo kwa Zelensky hakukuwa na umuhimu mkubwa kwa sababu juhudi zake za kidiplomasia hazijazaa matunda.
Kwa mujibu wa Bloomberg, kauli hii inaashiria kuwa Trump anaendelea na mbinu yake ya kufanya mazungumzo ya moja kwa moja na Urusi. Inaripotiwa kuwa Trump alizungumza na Rais wa Urusi, Vladimir Putin, kwa njia ya simu wiki iliyopita, huku maafisa waandamizi wa Marekani wakikutana na wenzao wa Urusi jijini Riyadh siku ya Jumatatu. Ukraine haikushiriki kwenye mazungumzo hayo, hali inayozua maswali kuhusu mustakabali wa ushiriki wake katika juhudi za amani zinazoendelea.