Kuna mvutano mkali unaoendelea huko Copenhagen, Denmark, kuhusu hatima ya sanamu mpya ya nguva iitwayo 'Nuru wa Bahari.' Sanamu hii yenye urefu wa mita nne, imekabiliwa na ukosoaji mkubwa, ikielezwa kuwa ina picha chafu na haifanani na mazingira ya urithi wa kitamaduni ilipowekwa. Mzozo huu unaibua maswali kuhusu uhuru wa sanaa na jinsi jamii inavyoitazama miili ya wanawake.
Kulingana na gazeti la Uingereza, The Guardian, Shirika la Kifalme la Jumba la Kifahari na Utamaduni nchini Denmark, limepanga kuiondoa sanamu hiyo iliyowekwa mbele ya ngome ya Dragør. Shirika hilo limedai kuwa sanamu hiyo haiendani na urithi wa kitamaduni wa eneo hilo, na hivyo inahitaji kuondolewa. Hali hii imeleta mtafaruku mkubwa kati ya wataalamu wa sanaa, wakosoaji, na umma kwa ujumla.
Sanamu hii, tofauti na sanamu maarufu ya nguva (Mermaid) iliyowekwa juu ya mwamba huko Copenhagen, imekosolewa kwa sababu ina matiti makubwa na inaonekana ‘chafu.’ Wengi wanasema inaashiria picha isiyofaa kwa jamii. Mathisa Krieger, mkosoaji wa sanaa wa gazeti la Denmark, Politiken, aliielezea sanamu hiyo kuwa 'mbaya na chafu,' huku mwandishi wa habari na mhubiri Sören Krarup akidai kuwa sanamu hiyo ni ‘ya udhalimu’ na inamfanya mtu ahisi amebanwa anapoiangalia.
Sanamu hii haiondolewi kwa mara ya kwanza. Hapo awali iliwekwa kwenye fukwe za Langelinie, lakini iliondolewa mnamo 2018 baada ya wakazi wa eneo hilo kuilalamikia, wakiiita 'nguva feki na chafu.' Baada ya kuondolewa huko, ndipo ikawekwa kwenye ngome ya Dragør, ambako sasa imekumbana na ukosoaji mwingine mkali.
Hata hivyo, baadhi ya watu wanaipinga hoja hii, wakidai kuwa ukosoaji unaolenga sanamu hiyo unaonyesha mtazamo potofu wa jamii kuhusu miili ya wanawake. Msanii wa sanamu hiyo, Peter Beck, alipinga ukosoaji huo, akisema kuwa matiti ya sanamu hiyo yanaendana na ukubwa wa sanamu nzima. Mhariri wa gazeti la Berlingske, Aminata Cor Trans, alionyesha wazi mtazamo huu kwa kusema, "Sanamu hii haionekani kuwa uchi kuliko sanamu maarufu ya nguva ya Copenhagen, lakini ina matiti makubwa zaidi, labda ndiyo shida iliyopo.”