Kampuni maarufu ya ndege nchini Marekani, Southwest Airlines, imetangaza mabadiliko makubwa katika sera yake kuhusu abiria wenye maumbile makubwa, hatua ambayo imezua mjadala mkali na kupokelewa kwa hisia tofauti. Kuanzia tarehe 27 Januari mwaka ujao, shirika hilo litawalazimu abiria ambao miili yao haiwezi kutoshea kikamilifu kwenye kiti kimoja kununua kiti cha ziada mapema kabla ya safari.
Kwa mujibu wa taarifa iliyotolewa na shirika hilo na kuripotiwa na gazeti la New York Times, sheria hii mpya inawalenga abiria ambao mwili wao unapanuka na kuingia katika nafasi ya kiti cha jirani. Kipimo kitakachotumika ni endapo abiria hawezi kukaa vizuri huku vishikio vyote viwili vya mikono vya kiti vikiwa vimeshushwa chini. Upana wa viti vya ndege za Southwest ni kati ya inchi 15.5 na 17.8 (takriban sentimita 39 hadi 45).
Mabadiliko haya ni pigo kubwa kwa wasafiri wengi wenye miili mikubwa, kwani hapo awali, Southwest Airlines ilijipatia sifa ya kuwa shirika linalowajali. Sera ya zamani iliruhusu abiria katika hali hii kupewa kiti cha ziada bila malipo iwapo kingekuwepo kwenye ndege wakati wa kuingia getini. Vilevile, hata kama abiria aliamua kununua kiti cha pili mapema, alikuwa na uhakika wa kurudishiwa fedha zake kwa urahisi iwapo ndege haikujaa. Hii iliifanya Southwest kuwa chaguo la wengi.
Hata hivyo, chini ya kanuni mpya, urejeshaji wa fedha kwa kiti cha ziada utakuwa na masharti magumu zaidi. Itahitaji kutimiza vigezo kadhaa, ikiwemo ndege kutokuwa imejaa na tiketi ya ziada kununuliwa katika daraja sawa na ile ya awali. Abiria ambao hawatanunua kiti cha ziada mapema watalazimika kufanya hivyo uwanja wa ndege. Ikiwa ndege itakuwa imejaa, watalazimika kubadilishiwa safari na kuwekwa kwenye ndege nyingine yenye nafasi.
Mashirika ya kutetea haki za binadamu yamepinga vikali sera hii, yakiitaja kuwa ni aina ya ubaguzi dhidi ya wateja. Tigress Osborn, Mkurugenzi wa Chama cha Kitaifa cha Kuwakubali Watu Wanene (NAAFA), alieleza kusikitishwa kwake akisema, "Southwest Airlines ilikuwa ndiyo tumaini pekee lililobaki kwa watu wenye miili mikubwa." Alionya kuwa hatua hii inaweza kusababisha baadhi ya abiria kuacha kabisa kusafiri kwa ndege kutokana na gharama za ziada na unyanyapaa.