Hali ya mambo katika Ukanda wa Gaza imezidi kuwa ya "pata shika nguo kuchanika" baada ya Kundi la Hamas kutoa sharti jipya na zito linaloonekana kubadili upepo wa mazungumzo ya amani. Katika kile kinachoonekana kama mbinu ya kisasa ya kidiplomasia, Hamas wamegoma kata kata kusalimisha silaha zao (disarmament) kama ilivyotakiwa kwenye makubaliano ya awali, na badala yake wamependekeza mpango wa "kuzifungia" au kuzifanya silaha hizo kuwa tulivu (freezing weapons) ili kumaliza vita.
Msimamo huo umewekwa wazi na Kigogo wa Siasa wa Hamas, Khaled Meshaal, kupitia mahojiano maalum na kituo cha runinga cha Al Jazeera hapo jana. Meshaal, ambaye maneno yake yana uzito mkubwa ndani ya kundi hilo, amesema wazi kuwa takwa la kuwataka Hamas watoe silaha zao zote ni sawa na kuwataka wajinyonge wenyewe, jambo ambalo haliwezekani kwa wapiganaji wa ukombozi.
"Wazo la kuweka silaha chini kikamilifu na kubaki mikono mitupu ni jambo lisilokubalika kwetu. Huku ni sawa na kunyang'anywa roho yetu," alisisitiza Meshaal kwa lugha ya picha, akiashiria kuwa silaha ndiyo uhai wa harakati zao.
Badala ya kusalimu amri, Hamas wamekuja na karata mpya mezani. Wanapendekeza utaratibu maalum wa kuhifadhi silaha hizo na kuhakikisha hazitumiki, kama sehemu ya dhamana ya kusitisha vita kwa muda mrefu. Meshaal anaamini kuwa pendekezo hili linaweza kukubalika kwa Serikali ya Marekani, ambayo anaiona kama "Mmjomba" mwenye mtazamo wa kimbiashara na kiutendaji (pragmatic) linapokuja suala la kumaliza mizozo.
"Tunajua Marekani wanataka nini. Tunataka kuwashawishi kuwa tunaweza kuweka utaratibu wa kuhakikisha silaha hizi hazileti madhara, ili kuhakikisha vita kati ya Gaza na Israel haijirudii," aliongeza Meshaal, akionyesha utayari wa kufanya kazi na wapatanishi wa kimataifa.
Katika hatua nyingine ya kushangaza, kiongozi huyo amegusia mpango wa Rais wa Marekani, Donald Trump, kuhusu kuleta kikosi cha kimataifa cha kulinda amani (International Stabilization Force - ISF). Kinyume na matarajio ya wengi, Hamas wameonekana kutopinga uwepo wa majeshi hayo ya nje. Sababu yao kubwa ni kwamba wanaamini kikosi hicho kitakuwa "ukuta" utakaotenganisha Gaza na uvamizi wa Israel, hivyo kuwapa ahueni Wapalestina.
Hata hivyo, mpango huo wa Hamas umekutana na kigingi kigumu kutoka Tel Aviv. Maafisa wa ngazi za juu wa Israel wamecharuka na kusema kuwa hakuna mjadala mbadala zaidi ya Hamas kufutika. "Hakuna lugha ya 'kufungia silaha'. Magaidi lazima wapokonywe silaha zote na Gaza iwe eneo lisilo na jeshi," kilikaririwa chanzo kimoja cha serikali ya Israel na shirika la habari la AFP.
Msimamo wa Israel unajikita kwenye mpango wa pointi 20 uliotolewa na Rais Trump mwezi Septemba, ambao unapendekeza kuundwa kwa "Kamati ya Amani" itakayosimamia Gaza kwa muda, huku Hamas wakiwa hawana nafasi yoyote ya kiutawala wala kijeshi. Israel inasisitiza kuwa mustakabali wa Gaza hauna nafasi kwa Hamas.
Mvutano huu unakuja wakati ambapo utekelezaji wa awamu ya pili ya makubaliano ya amani umekwama. Ingawa hatua ya kwanza ya kusitisha mapigano ilianza Oktoba, vipengele vigumu kama uundwaji wa serikali mpya, uingizwaji wa majeshi ya ISF, na hilo suala nyeti la silaha bado ni "mfupa uliomshinda fisi."
Macho na masikio ya jumuiya ya kimataifa sasa yanaelekezwa tarehe 29 mwezi huu, ambapo Waziri Mkuu wa Israel, Benjamin Netanyahu, anatarajiwa kukutana uso kwa uso na Rais Donald Trump. Kikao hicho kinatajwa kuwa cha kufa na kupona katika kuamua hatima ya mpango huo wa amani na mustakabali wa Ukanda wa Gaza unaoendelea kutaabika.