Rais wa Uturuki, Recep Tayyip Erdoğan, anatarajiwa kuwa miongoni mwa viongozi wakuu watakaohudhuria Mkutano wa 25 wa Jumuiya ya Ushirikiano ya Shanghai (SCO) unaoanza rasmi nchini China. Kitendo cha kiongozi wa nchi mwanachama muhimu wa Jumuiya ya Kujihami ya Nchi za Magharibi (NATO) kuhudhuria mkutano wa kilele wa jumuiya inayoongozwa na China na Urusi, kimeibua mjadala mpana kuhusu mwelekeo wa siasa za kimataifa.
Kwa mujibu wa taarifa kutoka Ubalozi wa Uturuki, Rais Erdoğan atahudhuria mkutano huo unaofanyika katika jiji la Tianjin kama mgeni mkuu, kufuatia mwaliko maalum kutoka kwa Rais wa China, Xi Jinping. Hii inathibitisha uhusiano unaozidi kuimarika kati ya Ankara na Beijing, licha ya Uturuki kuwa na ushirika wa kijeshi na mataifa ya Magharibi.
Jumuiya ya SCO, ambayo mara nyingi huitwa 'NATO ya Mashariki,' ni muungano wa kisiasa, kiuchumi, na kiusalama unaolenga kuimarisha ushirikiano katika ukanda wa Eurasia na kupunguza ushawishi wa Marekani na washirika wake. Uturuki si mwanachama kamili wa SCO, bali ina hadhi ya 'Mshirika wa Mazungumzo' tangu mwaka 2012, hadhi inayoiruhusu kushiriki katika mijadala na shughuli za jumuiya hiyo.
Ofisi ya Rais wa Uturuki imethibitisha kuwa Erdoğan atatoa hotuba katika kikao cha mkutano huo na pia atakuwa na mazungumzo ya faragha na viongozi wengine watakaohudhuria, akiwemo mwenyeji wake, Rais Xi Jinping. Mazungumzo haya yanatazamiwa kugusia masuala ya biashara, usalama wa kikanda, na kuimarisha uhusiano baina ya nchi zao.
Kwa miaka mingi, Rais Erdoğan amekuwa akionesha nia ya Uturuki kujiunga na SCO kama mwanachama kamili. Mara kadhaa, hasa wakati mchakato wa nchi yake kujiunga na Umoja wa Ulaya (EU) ulipokwama, aliwahi kusema, "Msitufunge na EU pekee," akidokeza kuwa SCO inaweza kuwa mbadala mzuri. Hatua hii ya sasa inaonekana kama sehemu ya mkakati wa Uturuki kucheza karata zake za kisiasa kwa kusawazisha uhusiano wake kati ya Mashariki na Magharibi.