Mlima Lewotobi Laki-Laki, ulioko nchini Indonesia, umelipuka tena kwa mara nyingine ndani ya mwezi mmoja, tukio lililopelekea mamlaka kutoa tahadhari ya juu kabisa nchini humo. Shirika la Volkano la Indonesia limeripoti kuwa mlipuko huo ulianza saa 11:35 jioni kwa saa za huko, na kurusha mawingu makubwa ya majivu hadi kufikia urefu wa kilomita 11 angani. Hali hii imeibua hofu mpya kwa wakazi wanaoishi karibu na mlima huo.
Kufuatia mlipuko huu, eneo la hatari la kilomita 7 kuzunguka kasoko la mlima huo wenye urefu wa mita 1584 limefungwa kabisa, na hakuna shughuli yoyote inayoruhusiwa ndani ya eneo hilo. Hadi sasa, hakuna ripoti zozote za majeruhi au vifo vilivyotokana na mlipuko huu wa hivi karibuni.
Bw. Muhammad Wafid, Mkuu wa Shirika la Jiolojia, amewaonya wakazi kuwa makini na kuepuka shughuli zote ndani ya eneo la kilomita 7 kutoka kwenye volkano. Pia ametoa tahadhari kuhusu uwezekano wa kutokea kwa mafuriko ya "lahar" – mchanganyiko wa matope na mabaki ya volkano – endapo kutakuwa na mvua kubwa. Akisisitiza umuhimu wa usalama, Bw. Wafid amewashauri wakazi kuvaa barakoa ili kujikinga na majivu ya volkano.
Shirika la Kitaifa la Kuzuia Maafa limethibitisha kuwa angalau kijiji kimoja kimehamishwa, na maeneo mengi nje ya eneo lililofungwa yamepokea mvua ya majivu. Inakadiriwa kuwa zaidi ya wakazi 16,000 wanaishi katika vijiji vilivyo karibu na mlima huu.
Historia ya mlipuko wa mlima huu inaendelea kusumbua. Mnamo Novemba mwaka jana, Lewotobi Laki-Laki ulilipuka mara kadhaa na kusababisha vifo vya watu tisa na maelfu ya wengine kulazimika kuhama makazi yao. Wakati huo, mawingu ya majivu pia yalisababisha kufutwa kwa safari za ndege. Mlipuko wa mwisho wa mlima huu ulitokea Mei, ambapo mamlaka iliongeza kiwango cha tahadhari hadi cha juu kabisa. Indonesia iko kwenye kanda inayojulikana kama "Ukanda wa Moto wa Pasifiki," eneo lenye volkano nyingi zinazofanya kazi, zikifikia zaidi ya 120.