Mlima Lewotobi Lakilaki, ulioko mashariki mwa Indonesia na wenye mwinuko wa mita 1,584, umelipuka tena, na kusababisha taharuki na onyo la kutokukaribia eneo la volkano hiyo lenye umbali wa kilomita 6. Mlipuko huu unakuja ikiwa ni takriban miezi kadhaa tu tangu ulipolipuka mwaka jana na kusababisha vifo vya watu tisa. Kulingana na Shirika la Habari la AP na vyanzo vingine vya habari, mlipuko wa kwanza ulitokea saa 2:48 usiku wa kuamkia jana, ukifuatana na mlipuko mwingine wenye nguvu zaidi takriban saa tano baadaye.
Kutokana na milipuko hiyo miwili, mamlaka ya Jiolojia ya Indonesia imethibitisha kuwa gesi iliyojikusanya kwa wiki kadhaa imesababisha mlipuko huo. Wakati wa mlipuko wa kwanza, majivu ya volkano yaliruka hadi urefu wa kilomita 10 kutoka kilele cha mlima. Katika mlipuko wa pili, ambao ulitokea mapema alfajiri, majivu yaliruka juu zaidi, yakifikia urefu wa kilomita 18. Mamlaka imeeleza kuwa mlipuko huu wa pili ulikuwa mkubwa zaidi kutokea nchini Indonesia tangu mwaka 2010. Pamoja na majivu, mawe ya moto yaliruka hadi umbali wa kilomita 8 kutoka kwenye kasoko.
Hadi sasa, hakuna ripoti za majeruhi au uharibifu wa mali zilizotolewa kufuatia milipuko hii ya hivi karibuni. Hata hivyo, mamlaka ya Indonesia imewaonya wakazi na watalii kuepuka kabisa eneo la kasoko ya mlima huo lenye umbali wa kilomita 6, kwa ajili ya usalama wao. Hii si mara ya kwanza kwa Mlima Lewotobi Lakilaki kulipuka, kwani mwaka jana mwezi Novemba, mlipuko wake ulisababisha vifo vya watu tisa na kujeruhi zaidi ya sitini. Indonesia ni nchi iliyoko kwenye eneo la "Pete ya Moto" ya Pasifiki, ambalo lina volkano hai zaidi ya 120 na mara kwa mara hukumbwa na matukio ya mitetemeko ya ardhi na milipuko ya volkano.