Zoezi la pamoja la kijeshi la majini kati ya India na Tanzania limeanza rasmi katika Bahari ya Hindi, likiashiria matumizi makubwa ya sayansi na teknolojia katika kuimarisha ulinzi, usalama, na kukuza uchumi wa bahari (uchumi wa bluu). Mazoezi haya ya siku sita, yanayojulikana kama Africa-India Key Maritime Exercise (AIKEYME), yanashirikisha mataifa mengine 11 ya Afrika.
Kwa mujibu wa Mkuu wa Majeshi ya Ulinzi, Jenerali Jacob Mkunda, mataifa hayo ni pamoja na Afrika Kusini, Djibouti, Shelisheli, Mauritius, Comoro, Msumbiji, Kenya, na Madagascar. Kuwasili kwa meli za kivita kutoka India kulikamilisha maandalizi ya zoezi hili lililoandaliwa kwa ushirikiano kati ya Kamandi ya Jeshi la Wanamaji la Tanzania na Jeshi la Wanamaji la India.
Waziri wa Ulinzi wa India, Sanjay Seth, alisema kuwa mazoezi hayo yanayofanyika katika Bahari ya Hindi yanajumuisha matumizi ya meli za kisasa, boti za mwendo kasi, ndege zisizo na rubani, na vifaa vingine vya kisasa vya kivita kutoka India. Vifaa hivi vinalenga kuimarisha uwezo wa kukabiliana na tishio lolote linaloweza kujitokeza kupitia baharini.
Akizungumzia kuwasili kwa meli hiyo katika bandari ya Dar es Salaam Jumamosi iliyopita, Waziri Seth alieleza kuwa lengo ni kutumia teknolojia ya hali ya juu kuimarisha ulinzi katika eneo muhimu la Bahari ya Hindi.
Ufunguzi rasmi wa operesheni hiyo ya majini ulifanywa kwa pamoja na Waziri wa Ulinzi wa Tanzania, Dkt. Stergomena Tax, na Waziri wa Ulinzi wa India, Sanjay Seth. Picha zilionyesha ndege na boti za kisasa za ulinzi baharini zikiwa tayari kwa kuanza mazoezi hayo ya pamoja.
Zoezi hilo lilianza rasmi Jumapili ya Aprili 13 na linatarajiwa kufungwa tarehe 18 Aprili. Lengo kuu ni kuongeza ujuzi kwa vikosi vyote vinavyoshiriki katika kukabiliana na changamoto za kiusalama, hususan katika maeneo ya baharini.
Miongoni mwa walioshuhudia kuanza kwa zoezi hilo ni Mkuu wa Majeshi, Jenerali Mkunda, na Kamanda Mkuu wa Kikosi cha Majini cha India, Admiro Dimesh Tripathi.
Waziri wa Ulinzi wa Tanzania, Dkt. Stergomena Tax, alieleza kuwa Tanzania itanufaika sana kupitia mazoezi haya kwa kupata ujuzi, uzoefu, na kuimarisha uwezo wake katika matumizi ya zana za kisasa za kiulinzi baharini.
Alisema: “Wanajeshi wetu na wale wa nchi nyingine zinazoshiriki watapata fursa ya kujifunza na kubadilishana uzoefu kuhusu mbinu bora za kupambana na uhalifu mbalimbali unaofanyika baharini kama vile uvuvi haramu, usafirishaji haramu wa binadamu, biashara ya madawa ya kulevya, na ugaidi.”
Aliongeza: “Wenzetu wa India wana meli za kisasa zaidi, vifaa vya teknolojia ya juu, ujuzi na utaalamu mkubwa. Kupitia ushirikiano huu, tutaweza kupata uzoefu muhimu katika kulinda nchi yetu na kukabiliana na matukio yanayohusiana na bahari, na hivyo kutuwezesha kukuza uchumi wetu wa bluu.”
Dkt. Stergomena alifafanua kuwa mazoezi haya ni matokeo ya ziara ya Rais Samia Suluhu Hassan nchini India mwaka 2023, ambapo alikubaliana na Waziri Mkuu wa India, Narendra Modi, kushirikiana katika sekta mbalimbali, ikiwemo sekta ya ulinzi.
“Tutahakikisha kama Tanzania tunakuwa wenyeji wazuri katika zoezi hili. Tunataka kuona kila tunachojifunza na kubadilishana katika masuala ya teknolojia kinakuwa na matokeo chanya kwa nchi yetu,” alisisitiza Waziri Stergomena.
Waziri wa Ulinzi wa India, Sanjay Seth, alisema kuwa India ni moja ya mataifa yanayonufaika sana na Bahari ya Hindi. Aliongeza kuwa nchi yake imeamua kufanya mazoezi haya na mataifa ya Afrika kutokana na ukaribu wa kijiografia wa bahari, pamoja na uhusiano wa kiutamaduni, kiuchumi, na kihistoria.
Alieleza kuwa kutokana na kasi ya maendeleo ya teknolojia duniani katika nyanja zote, ikiwa ni pamoja na ulinzi, biashara, na uchumi, ni jambo zuri kuona nchi nyingine zikifaidika hasa katika upatikanaji wa vifaa na ujuzi wa ulinzi wa baharini.
“Wanajeshi kutoka nchi zote zinazoshiriki katika AIKEYME wanabadilishana ujuzi na uzoefu kuhusu mbinu za kupambana na biashara haramu ya dawa za kulevya, uvuvi haramu, na usafirishaji haramu wa binadamu, kwa lengo la kulinda amani na kuleta maendeleo katika mataifa yetu yanayopakana na Bahari ya Hindi,” alisisitiza Bw. Seth.
Aliongeza kuwa washiriki watabadilishana uzoefu katika matumizi ya zana za kisasa za kulinda bahari, na hatimaye kila nchi itanufaika na rasilimali za uchumi wa bluu.
Kwa upande wake, Mkuu wa Majeshi, Jenerali Mkunda, aliwahakikishia wananchi kuwa hawapaswi kuwa na hofu wanapoona vifaa vya kijeshi baharini, akieleza kuwa ni jambo la kawaida na endelevu kufanya mazoezi ya ulinzi na usalama katika eneo hilo.
“Ni jambo la kawaida kwa Jeshi la Ulinzi wa Wananchi wa Tanzania kufanya mazoezi ya pamoja na nchi mbalimbali rafiki,” alisema Jenerali Mkunda.
“Katika zoezi hili la AIKEYME, tunataka kuona ni kwa namna gani tunaweza kupambana na uhalifu unaofanyika baharini kwa ushirikiano na wenzetu wa India kwa ufanisi zaidi na kwa kutumia teknolojia ya kisasa,” aliongeza.
Jenerali Mkunda alikumbusha kuwa kufanya mazoezi kama haya na nchi rafiki ni jambo linalofanyika mara kwa mara, akitolea mfano mazoezi waliyofanya na China mwaka jana, na Wamarekani mwaka huu, yote yakilenga kuimarisha uwezo wa Tanzania kukabiliana na matishio ya kihalifu baharini.
Sambamba na mazoezi ya kijeshi yanayoendelea baharini karibu na pwani ya Dar es Salaam, kampuni mbalimbali za India zilifanya maonyesho ya vifaa vya kijeshi ambavyo vinaweza kutumika katika matukio mbalimbali ya kusaidia na kuhudumia raia.
Vifaa vilivyoonyeshwa ni pamoja na ndege za kisasa za uchunguzi, ndege zisizo na rubani (droni), na zana nyingine za kupambana na matishio ndani ya bahari.
Moja ya zana iliyoonekana kuvutia wengi ni ndege isiyo na rubani aina ya ‘Switch UAV’, ambayo ina uwezo wa kufanya kazi mbalimbali, ikiwemo matumizi ya kivita, uchunguzi wa baharini na ardhini. ‘Droni’ hiyo inatumia mfumo wa kisasa na inaweza kutumika pia katika shughuli za kiraia kama vile kutafuta na kulinda wanyamapori, kuangalia wingi wa samaki baharini, na kupiga picha kwa ajili ya kuhifadhi data za ardhi na rasilimali mbalimbali.
“Ndege hizi zisizo na rubani, pamoja na matumizi yake katika masuala ya vita au kupambana na matishio ya baharini, ni msaada mkubwa katika shughuli mbalimbali za kijamii,” alisema mmoja wa washiriki wa maonyesho hayo, Bw. Tushar Bidawe.