Visiwa vya Chagos, vilivyoko katika Bahari ya Hindi ambavyo Uingereza ilikuwa imepanga kukabidhi mamlaka yake kwa Mauritius, hatimaye uhamishaji huo umesitishwa kwa muda kufuatia agizo la mahakama. Visiwa hivi ni muhimu sana kimkakati kwani vinajumuisha kisiwa cha Diego Garcia, ambacho kina kituo cha kijeshi cha majini na anga cha Marekani.
Ingawa Uingereza ilikubali kukabidhi mamlaka ya visiwa vyote vya Chagos kwa Mauritius, ilipanga kubaki na udhibiti wa Diego Garcia kwa kukikodisha kwa muda usiopungua miaka 99. Hata hivyo, chama cha upinzani cha Conservative nchini Uingereza kilikosoa hatua hiyo kikisema inatishia usalama wa Uingereza na washirika wake. Hapo awali, Waziri wa Mambo ya Nje wa Marekani, Marco Rubio, pia alisema kuwa kukabidhi visiwa hivyo kwa Mauritius kunaweza kuwa tishio kubwa kwa usalama wa taifa la Marekani.
Visiwa vya Chagos, ambavyo vinajumuisha zaidi ya visiwa 60, viko kusini mwa Maldives na vilikuwa chini ya utawala wa Uingereza tangu mwaka 1814. Mnamo Oktoba mwaka jana, Uingereza ilikubaliana kukabidhi mamlaka kwa Mauritius, lakini utiaji saini wa makubaliano hayo uliahirishwa kwa sababu ya kusubiri idhini kutoka kwa Rais wa Marekani wakati huo, Donald Trump. Zaidi ya hayo, mabadiliko ya serikali nchini Mauritius na mgogoro kuhusu kodi ya upangaji wa Diego Garcia ulisababisha kuahirishwa zaidi kwa utiaji saini. Marekani imekuwa ikilipa Uingereza kiasi ambacho hakijafichuliwa kwa ajili ya kuendesha kituo hicho cha kijeshi.
Visiwa vya Chagos vinajulikana sana kwa kituo cha kijeshi cha Diego Garcia, ambacho kimekuwa muhimu katika kusaidia operesheni za kijeshi za Marekani kuanzia Vietnam hadi Iraq na Afghanistan. Mwaka 2008, Marekani ilikiri kwamba kituo cha Diego Garcia kilitumika kwa ndege za siri zilizokuwa zikiwasafirisha washukiwa wa ugaidi.
Uingereza ilitenganisha visiwa vya Chagos kutoka Mauritius mwaka 1965, miaka mitatu kabla ya Mauritius kupata uhuru, na kuvifanya kuwa eneo lake la ng'ambo. Katika miaka ya 1960 na 1970, Uingereza iliwahamisha kwa nguvu hadi watu 2,000 kutoka visiwa hivyo kwenda Uingereza ili kuruhusu Marekani kujenga kituo cha kijeshi cha Diego Garcia.
Marekani inachukulia kituo hicho, ambacho kina takriban wanajeshi 2,500 wengi wao wakiwa Wamarekani, kama "kituo muhimu sana" kwa operesheni za usalama katika Mashariki ya Kati, Asia ya Kusini, na Afrika Mashariki. Hivi karibuni, Marekani iliweka ndege kadhaa za kivita za B-2 Spirit, ambazo zina uwezo wa kubeba silaha za nyuklia, huko Diego Garcia kwa ajili ya operesheni kubwa ya mashambulizi dhidi ya waasi wa Houthi nchini Yemen.
Hapo awali, Waziri Mkuu wa Mauritius, Navin Ramgoolam, alikuwa akifanya mazungumzo ya ziada na Uingereza akisema kuwa kiasi cha pauni milioni 90 (takriban TZS bilioni 280) ambazo Uingereza ilikubali kulipa Mauritius kama kodi ya upangaji hakitoshi. Alikuwa amepanga kutia saini makubaliano ya mwisho na Uingereza mnamo Mei 22, lakini mahakama ya Uingereza ilitoa agizo likisema kuwa "Uingereza inapaswa kuendelea kuwa na mamlaka juu ya visiwa vya Chagos," na hivyo kusimamisha utiaji saini huo.