Mvua kubwa ya ghafla, inayojulikana kama "mvua ya mawingu," imeleta maafa makubwa kaskazini-magharibi mwa Pakistan, na kusababisha mafuriko na maporomoko ya ardhi yaliyopelekea vifo vya takriban watu 220. Shirika la habari la AP limeripoti kuwa maafa haya yalitokea katika wilaya ya Buner, iliyoko katika mkoa wa Khyber Pakhtunkhwa, ambapo mbali na vifo hivyo, makumi ya watu bado hawajulikani waliko.
Takwimu za awali zilionyesha vifo vya watu 157, lakini timu za uokoaji zilizokuwa zikifanya kazi katika maeneo yaliyoathirika, zimefanikiwa kuopoa miili mingine 63 kutoka kwenye vifusi vya nyumba zilizoanguka. Wafanyakazi wa uokoaji wamekuwa wakitumia boti na helikopta kuwaokoa watu waliokwama kwenye mafuriko, huku wakishuhudia uharibifu mkubwa uliosababishwa na maji yenye nguvu nyingi.
Shahidi mmoja alielezea jinsi mafuriko hayo yalivyokuwa na nguvu, akisema aliona “maji yakisomba mamia ya mawe makubwa.” Afisa wa polisi wa Pakistan alieleza kuwa mafuriko hayo, yaliyokuwa yakisindikizwa na mawe yenye uzito wa tani nyingi, yalisomba ghafla nyumba kati ya 60 na 70 katika kijiji cha Pir Baba. Maafisa wa uokoaji wamesema idadi ya vifo inaweza kuongezeka zaidi kadiri shughuli za utafutaji na uokoaji zinavyoendelea.
Kutokana na hali hiyo ya hatari, Waziri Mkuu wa Pakistan, Shehbaz Sharif, alifanya mkutano wa dharura na kuagiza uhamishwaji wa haraka wa watalii na waathirika wa mafuriko. Vile vile, Mamlaka ya Kitaifa ya Kudhibiti Maafa ilitangaza hali ya hatari katika eneo lote la Buner. Hata hivyo, juhudi za utoaji msaada zilikumbana na changamoto, ambapo helikopta iliyokuwa imebeba misaada ilianguka katika milima ya Bajaur kutokana na hali mbaya ya hewa. Ajali hiyo ilisababisha vifo vya watu wote watano waliokuwemo, wakiwemo marubani wawili.
Kwa mujibu wa Mamlaka ya Kitaifa ya Kudhibiti Maafa, zaidi ya watu 541 wamekufa kutokana na mvua tangu mwishoni mwa mwezi Juni. Mvua za hivi karibuni zimewasababishia vifo takriban watu 351, hasa katika maeneo ya kaskazini-magharibi na kaskazini mwa nchi. Hali kama hiyo imeripotiwa pia nchini India, ambapo hivi karibuni, mvua hizo zilisababisha vifo vya watu 60 na kuacha wengine 80 hawajulikani waliko katika kijiji cha Kishwar. Wataalamu wanasema ongezeko la mara kwa mara la “mvua za mawingu” katika eneo hili linahusishwa na mabadiliko ya hali ya hewa duniani na ongezeko la joto.