Kufuatia mvutano mkubwa nchini Uingereza, hivi karibuni mji mkuu wa London ulishuhudia maandamano makubwa yaliyoongozwa na makundi ya siasa kali za mrengo wa kulia, yakipinga vikali sera za uhamiaji. Maandamano hayo, yaliyovuta takriban watu 110,000, yaliendeshwa na Tommy Robinson, mwanaharakati maarufu anayepinga Uislamu na uhamiaji haramu, ambaye jina lake halisi ni Stephen Yaxley-Lennon. Robinson ndiye mwanzilishi wa Shirikisho la Ulinzi la Uingereza (English Defence League), kundi lenye ushawishi mkubwa wa siasa kali nchini humo.
Shirika la habari la AP liliripoti kuwa maandamano hayo ya tarehe 13, yaliulemaza mji wa London. Waandamanaji walitumia kaulimbiu kama "Unite the Kingdom" (Tuungane Uingereza) wakikabiliana na makundi pinzani, hali iliyosababisha ghasia na vurugu. Maandamano hayo yalisababisha mapigano makali kati ya waandamanaji na maafisa wa polisi waliokuwa wakijaribu kudhibiti hali hiyo. Baadhi ya waandamanaji walimjeruhi polisi kwa kuwapiga ngumi, mateke na kuwarushia chupa, na hivyo kusababisha uhitaji wa polisi zaidi ya 1,000 kuingizwa uwanjani na kukabiliana na waandamanaji.
Katika hotuba yake kwa waandamanaji, Robinson alidai kuwa wahamiaji wana haki zaidi za kisheria mahakamani kuliko Waingereza walioijenga nchi. Waandamanaji walibeba mabango yenye jumbe kama "Simamisheni Boti za Wakimbizi," "Warudisheni," na "Tumechoka, Ookoeni Watoto Wetu." Walionekana wakipeperusha bendera za England zenye msalaba mwekundu na bendera za Uingereza (Union Jack) huku wakishangilia, "Tunaitaka Nchi Yetu Irudi."
Vyombo vya habari nchini Uingereza vimeeleza kuwa maandamano haya yamejitokeza katika kipindi ambacho taifa limegawanyika sana kuhusu suala la uhamiaji. Mvutano huu umeongezeka zaidi katika miezi ya hivi karibuni, kukiwa na ripoti za mara kwa mara za waandamanaji wa kupinga uhamiaji wakipinga vikali wahamiaji wanapoishi, kama vile mbele ya hoteli na hosteli. Kisa cha hivi karibuni cha mhamiaji mmoja kutoka Ethiopia kuhukumiwa kwa kosa la kumbaka msichana wa miaka 14 katika kitongoji cha London kimeongeza zaidi hasira za umma na kuchochea mvutano huo.
Wakati hayo yakiendelea, mfanyabiashara maarufu Elon Musk, Mkurugenzi Mtendaji wa Tesla, amekuwa akishutumu serikali ya Uingereza kwa kile anachokiita mwelekeo wake wa kisiasa wa mrengo wa kushoto na sera zake za uhamiaji. Musk amedai kuwa, "Uingereza inaporomoka. Hatimaye, itamezwa na idadi kubwa ya wahamiaji wasio na udhibiti." Maandamano haya yanaashiria ukubwa wa mgawanyiko wa kijamii na kisiasa nchini Uingereza.