Janga kubwa la kimazingira limeikumba nchi ya Namibia baada ya moto mkubwa kuteketeza takriban theluthi moja ya eneo la Hifadhi ya Taifa ya Etosha, ambayo ni moja ya hifadhi muhimu na maarufu zaidi barani Afrika. Moto huo, ambao umesambaa kwa kasi kutokana na upepo mkali na ukame, umetajwa kuwa tishio kubwa kwa bayoanuwai na hasa makazi adimu ya Faru Weusi, ambao ni miongoni mwa wanyama walio katika hatari kubwa ya kutoweka duniani.
Akizungumza na taifa, Makamu wa Rais wa Namibia, Lucia Witbooi, alieleza kuwa hali ni mbaya na kwamba moto huo unaendelea kusababisha uharibifu mkubwa. "Moto huu ni tishio kubwa kwa uhai wa wanyamapori wetu na mfumo mzima wa ikolojia," alisema. Ili kukabiliana na maafa haya, serikali imechukua hatua za dharura kwa kupeleka zaidi ya wanajeshi 500, helikopta za kuzima moto, pamoja na maafisa wa hifadhi na wazima moto wanaopambana na moto huo usiku na mchana.
Chanzo cha moto huo, unaoaminika kuanza Septemba 22 katika eneo la kusini-magharibi mwa hifadhi, bado kinachunguzwa. Hata hivyo, taarifa kutoka Wizara ya Mazingira ya Namibia zinaonyesha shaka kuwa huenda ulianzia katika kituo cha kuzalisha mkaa kwenye shamba moja linalopakana na hifadhi. Uharibifu uliotokea ni mkubwa, huku eneo la kilomita za mraba 7,700—eneo kubwa kuliko nchi ya Visiwa vya Comoro—likiwa limeungua na kugeuka majivu. Picha za kutisha kutoka kituo cha taifa cha utangazaji zimeonyesha miti iliyoteketea na wanyama kama swala wakikimbia kuokoa maisha yao.
Hifadhi ya Taifa ya Etosha, yenye ukubwa wa kilomita za mraba 22,200, ni hazina ya urithi wa asili kwa Afrika. Ni nyumbani kwa maelfu ya wanyama wakiwemo tembo, simba, twiga, pundamilia, na inasifika kimataifa kwa kuwa na eneo kubwa tambarare la chumvi (salt pan) ambalo hugeuka ziwa wakati wa masika na kuvutia maelfu ya ndege aina ya flamingo. Muhimu zaidi, hifadhi hii ni ngome muhimu kwa uhifadhi wa Faru Weusi, na janga hili la moto linaweka hatarini mustakabali wa viumbe hawa.