Jamii ya elimu katika jimbo la Iowa nchini Marekani imepigwa na butwaa kufuatia kukamatwa kwa Msimamizi Mkuu wa shule za umma za jiji la Des Moines, Dkt. Ian Roberts, na Maafisa wa Uhamiaji na Forodha (ICE). Roberts, kiongozi anayeheshimika katika wilaya kubwa zaidi ya shule jimboni humo, anatuhumiwa kuishi nchini humo kinyume cha sheria.
Taarifa kutoka ICE iliyotolewa siku ya Ijumaa, Septemba 27, ilibainisha kuwa Roberts alikuwa na agizo la mwisho la kufukuzwa nchini tangu mwaka 2024 na alikuwa akifanya kazi bila kibali halali.
Tukio la kukamatwa kwake lilikuwa kama la kwenye filamu. Maafisa wa ICE walijaribu kumsimamisha alipokuwa akiendesha gari la shule. Badala ya kusimama, Roberts anadaiwa kulitelekeza gari hilo na kukimbilia katika msitu uliokuwa karibu. Hata hivyo, kwa msaada wa polisi wa jimbo la Iowa, alifanikiwa kukamatwa na kupelekwa katika gereza la Kaunti ya Woodbury.
Wakati wa kukamatwa, ICE iliripoti kuwa Roberts alikutwa na bastola iliyokuwa na risasi, kisu cha uwindaji, pamoja na fedha taslimu kiasi cha Dola za Marekani 3,000 (takriban Shilingi za Kitanzania milioni 7.8). Sam Olson, afisa wa eneo wa ICE, alisisitiza kuwa "kisa hiki cha mtu mwenye agizo la kufukuzwa kuendelea kuishi na kuajiriwa kinyume cha sheria ni cha kushtua na funzo kwa wazazi."
Taarifa za kukamatwa kwake zimepokelewa kwa mshtuko mkubwa na wasiwasi na bodi ya shule na walimu. Msemaji wa wilaya ya shule, Phil Roeder, alisema walitarajia kuwa na Dkt. Roberts katika hafla ya shule asubuhi hiyo lakini alituma ujumbe mfupi kwamba hatoweza kufika, na muda mfupi baadaye walishuhudia kukamatwa kwake kupitia simu ya video. "Hatujawahi kuona ushahidi wowote kwamba yeye si raia," alisema Roeder.
Viongozi wa elimu na walimu walimwelezea Roberts kama "kiongozi shupavu" na "mwenge angavu" aliyekuwa na uhusiano wa kipekee na wanafunzi.
Ian Roberts alichukua wadhifa wa Msimamizi Mkuu mwezi Julai 2023, akisimamia wanafunzi 30,000 na wafanyakazi 5,000. Historia yake inaonyesha kuwa alizaliwa na wazazi wahamiaji kutoka Guyana na kukulia Brooklyn, New York. Aliingia Marekani mwaka 1999 kwa kutumia viza ya mwanafunzi na mwaka uliofuata, aliiwakilisha nchi yake ya Guyana katika Michezo ya Olimpiki kwenye riadha.
Hii si mara ya kwanza kwa Roberts kukumbana na mkono wa sheria. Mwaka 2022, alipatikana na hatia ya kumiliki bunduki yenye risasi ndani ya gari kinyume cha sheria katika jimbo la Pennsylvania na kutozwa faini ya Dola 100, ambapo alidai kuwa alilengwa kutokana na rangi ya ngozi yake.
Kukamatwa kwake kumezua mivutano mikubwa, huku makundi ya wakazi wakifanya maandamano mbele ya majengo ya serikali kuu jijini Des Moines na Iowa City kupinga hatua hiyo ya ICE.