Ukweli mchungu kuhusu vifo vya waandamanaji nchini Nepal umeanza kuwekwa wazi, baada ya ripoti rasmi ya uchunguzi wa kitabibu kuthibitisha kuwa idadi kubwa ya raia waliouawa wakati wa ghasia za hivi karibuni walipigwa risasi za moto zilizofyatuliwa kutoka kwenye silaha za kivita.
Taasisi ya Tiba ya Chuo Kikuu cha Tribhuvan imetoa ripoti inayoeleza kuwa kati ya miili 47 ya waandamanaji iliyofanyiwa uchunguzi, imebainika kuwa vifo 33 vilisababishwa na risasi za moto. Matokeo ya uchunguzi yameonesha kuwa wengi wa wahanga walilengwa kwenye maeneo hatari ya mwili, ambapo 18 walipigwa kifuani, 10 kichwani, 4 tumboni, na 2 shingoni. Mtu mmoja pekee ndiye aliyebainika kupigwa risasi ya mpira. Hii ni mara ya kwanza kwa mamlaka rasmi kuthibitisha matumizi ya silaha hatari za kivita dhidi ya raia.
Maandamano makubwa yalizuka nchini humo baada ya serikali ya wakati huo, mnamo Septemba 5, kupiga marufuku mitandao 26 ya kijamii, ikiwemo YouTube na Facebook. Hatua hiyo iliwasha moto wa hasira, hasa miongoni mwa vijana ambao tayari walikuwa wamechoshwa na serikali kushindwa kupambana na rushwa na kukuza uchumi. Ghasia zilisambaa kutoka mji mkuu, Kathmandu, hadi miji mingine.
Polisi walijibu kwa nguvu kubwa, wakitumia mabomu ya machozi, magari ya kuwasha maji, na risasi za mpira. Hali ilizidi kuwa mbaya pale waandamanaji walipochoma moto majengo ya serikali, ikiwemo makazi ya Rais na Waziri Mkuu. Kwa mujibu wa Wizara ya Afya ya Nepal, jumla ya watu 74, wakiwemo maafisa watatu wa polisi, walipoteza maisha na wengine zaidi ya 2,000 kujeruhiwa.
Kufuatia shinikizo, Waziri Mkuu wa wakati huo, Sharma Oli, alijiuzulu. Hata hivyo, amekanusha vikali kutoa amri ya kutumia risasi za moto na ameitaka serikali ya mpito kuchunguza tukio hilo, akidai huenda silaha zilizotumika hazikuwa za jeshi la polisi. Waandamanaji, kwa upande wao, wanadai Bw. Oli na aliyekuwa Waziri wake wa Mambo ya Ndani wakamatwe na kushitakiwa. Hivi sasa, kamati maalum iliyoundwa na serikali ya mpito inaendelea na uchunguzi, huku jeshi la polisi likikataa kutoa tamko lolote.