Jeshi la Israel limedai kuharibu zaidi ya malori 100 yanayotumiwa na Hamas, kundi la wanamgambo wa Kipalestina. Taarifa kutoka kwa vyombo vya habari vya Israel, kama vile Times of Israel (TOI), zinasema kuwa jeshi hilo limesema limefanikiwa kuharibu malori hayo ambayo Hamas iliyatumia wakati wa mashambulizi yake dhidi ya kusini mwa Israel mnamo Oktoba 7, 2023.
Inaelezwa kuwa Hamas iliendelea kutumia malori hayo kwa shughuli zake za kijeshi ndani ya Ukanda wa Gaza, ikiwa ni pamoja na kusafirisha silaha.
TOI iliripoti kuwa "Hamas ilitumia malori haya hivi karibuni wakati wa hafla za propaganda za kuachiliwa huru kwa mateka." Pia iliongeza kuwa mashambulizi ya anga ya Israel yaliyolenga malori hayo yalifanyika katika Ukanda wote wa Gaza, na majengo mengi ambayo yalikuwa yanahifadhi malori hayo pia yameharibiwa.
Wakati huohuo, Shirika la Msalaba Mwekundu la Kimataifa (ICRC) limetangaza kuwa ofisi yake iliyoko katika mji wa Rafah kusini mwa Gaza imeshambuliwa na kupata uharibifu mkubwa. ICRC ilisema kuwa mawasiliano na wafanyakazi wake wa afya ya dharura yamekatika, na hivyo kusababisha changamoto katika shughuli za misaada. Shirika hilo lilikazia kuwa wafanyakazi wa misaada ya kibinadamu, vifaa, na miundombinu yao haipaswi kamwe kushambuliwa.