Mashirika ya Umoja wa Mataifa yametoa onyo kali kuhusu hali ya kibinadamu nchini Sudan, yakieleza kuwa mji wa El Fasher, uliopo jimbo la Darfur Kaskazini, umegeuka kuwa kitovu cha mateso na maafa kwa watoto. Hii ni baada ya mji huo kutimiza siku 500 ukiwa chini ya mzingiro mkali unaotekelezwa na kikundi cha wanamgambo cha Rapid Support Forces (RSF).
Ofisi ya Umoja wa Mataifa ya Kuratibu Masuala ya Kibinadamu (OCHA) imesema hali katika jimbo zima la Darfur Kaskazini tayari ni mbaya mno, lakini inazidi kuwa mbaya zaidi kwa kasi ya kutisha. Shirika la Kuhudumia Watoto la Umoja wa Mataifa (UNICEF) limeongeza kuwa kila siku, maisha ya watoto wasio na hatia yanapotea kutokana na utapiamlo, magonjwa, na mapigano yanayoendelea.
Inakadiriwa kuwa raia 260,000, nusu yao wakiwa ni watoto, wamenaswa ndani ya mji huo kwa zaidi ya miezi 16. Mzingiro huo umekata kabisa njia zote za msaada, na kuwaacha wakazi wakining'inia kati ya uhai na mauti bila chakula, dawa, wala huduma muhimu.
Takwimu zilizotolewa na UNICEF zinaonyesha ukubwa wa janga hili. Tangu Januari mwaka huu pekee, takriban watoto 10,000 mjini El Fasher wamepatiwa matibabu ya utapiamlo mkali, idadi ambayo ni karibu mara mbili ya ile ya mwaka jana. Hali ni mbaya kiasi kwamba katika kipindi cha wiki moja tu, vifo 63 viliripotiwa, wengi wao wakiwa ni wanawake na watoto, vilivyosababishwa na njaa na utapiamlo.
UNICEF imesema mzingiro wa RSF umefunga kabisa njia zote za usambazaji, hivyo hata vituo vya afya na timu za madaktari wanaotembea hawana uwezo wa kupokea shehena mpya za vyakula vya tiba. Kwa sasa, inakisiwa kuwa watoto 6,000 wanakabiliwa na utapiamlo uliokithiri bila kupata matibabu yoyote.
Zaidi ya njaa, janga la magonjwa nalo limeibuka. OCHA imeripoti mlipuko wa ugonjwa wa kipindupindu (cholera) ambao unaenea kwa kasi, hasa katika maeneo ya mbali ambapo timu za afya haziwezi kufika kutokana na ukosefu wa usalama na vizuizi.
Madhara ya vita yenyewe kwa watoto ni ya kutisha. UNICEF imerekodi zaidi ya matukio 1,100 ya uhalifu mkubwa wa kivita ndani ya mji wa El Fasher tangu mzingiro ulipoanza Aprili 2024. Matukio haya yamesababisha vifo au ulemavu wa kudumu kwa watoto zaidi ya 1,000. Shirika hilo limesisitiza kuwa idadi halisi ya waathirika inahofiwa kuwa kubwa zaidi, kutokana na ugumu wa kufanya uchunguzi na kuthibitisha uhalifu katika eneo la vita.