Katika tukio la kushangaza na kushtua lililotokea mashariki mwa China, mwanamke mmoja mzee wa miaka 82, aliyetambulika kwa jina la Zhang, amelazwa hospitalini akiwa na maambukizi makubwa ya vimelea hatari baada ya kujaribu tiba ya kienyeji ya ajabu: kumeza vyura hai. Bibi huyo alichukua hatua hiyo ya kutisha akiamini ingemwondolea maumivu sugu ya mgongo yaliyokuwa yakimtesa kwa miaka mingi.
Kwa mujibu wa mtoto wake wa kiume, Bi. Zhang alikuwa akisumbuliwa kwa muda mrefu na tatizo la ute baina ya mifupa ya mgongo (disc), hali iliyomfanya atafute suluhu popote. Baada ya kusikia kuhusu tiba ya kimila iliyokuwa ikitumika katika eneo lao, aliamua kuijaribu bila kujali hatari zake. Kwa mujibu wa tiba hiyo, kumeza vyura hai kungeweza kutuliza maumivu yake.
Bila kusita, bibi huyo alimeza vyura watatu wakiwa hai siku ya kwanza, na kesho yake akaongeza wengine watano, na kufikisha jumla ya vyura wanane alioingiza mwilini mwake. Vyura hao, waliokuwa na ukubwa wa kiganja cha mkono, aliwameza bila hata ya kuwaosha wala kuwapika.
Ingawa mwanzoni alihisi nafuu kidogo na usumbufu mdogo tumboni, hali ilibadilika na kuwa mbaya zaidi kadri siku zilivyosonga. Alianza kupata maumivu makali ya tumbo, kutapika, na mwili wake kudhoofika kwa kasi, hali iliyoilazimu familia yake kumkimbiza hospitalini.
Baada ya vipimo vya kina, madaktari waligundua kitu cha kutisha ndani ya mwili wake – maambukizi ya vimelea vinavyojulikana kitaalamu kama 'Sparganum'. Hawa ni aina ya minyoo wachanga ambao hupatikana hasa ndani ya wanyama kama vyura na reptilia wengine. Vimelea hawa wakiingia kwenye mwili wa binadamu, husababisha madhara makubwa kulingana na eneo wanaloshambulia.
Bi. Zhang alilazimika kulazwa kwa wiki mbili akipatiwa dawa kali za kuua vimelea hivyo na kwa sasa anaendelea kupata nafuu nyumbani. Madaktari katika hospitali hiyo wameonya vikali dhidi ya tiba za aina hii, wakisema kuwa si mara ya kwanza kupokea wagonjwa wenye matatizo kama hayo.
Daktari O-Jungwon kutoka Hospitali ya Chuo Kikuu cha Zhejiang alitoa onyo kali akisema, "Bado kuna baadhi ya watu wanaoamini katika tiba hatari kama kunywa nyongo ya nyoka mbichi, kula matumbo ya samaki mabichi, au hata kujibandika ngozi ya chura mwilini. Hizi ni mila za kishirikina zisizo na uthibitisho wowote wa kisayansi na zinaweza kusababisha madhara makubwa kiafya, ikiwemo kifo."