Gavana wa Illinois Acharuka, Aita Kitendo cha Serikali Kuu "Cha Kipumbavu na Kinyume na Uamerika"
Jiji la Chicago katika jimbo la Illinois, Marekani, limeingia katika hali ya sintofahamu na mivutano mikali kufuatia uamuzi wa Rais Donald Trump kupeleka wanajeshi wa Gadi ya Taifa (National Guard) kudhibiti kile alichokiita hali mbaya ya usalama. Uamuzi huo umepingwa vikali na umezua maandamano makubwa, huku hali ikizidi kuwa tete baada ya afisa wa serikali kuu kumfyatulia risasi raia.
Shirika la habari la AP limeripoti kuwa Idara ya Usalama wa Taifa (Department of Homeland Security) ilithibitisha mnamo tarehe 4 Oktoba, 2025, kwamba mmoja wa maafisa wake wa uhamiaji alimjeruhi kwa risasi mwanamke katika jiji la Chicago. Idara hiyo ilitoa maelezo ikidai kuwa afisa huyo alilazimika kufyatua risasi kwa lengo la kujilinda baada ya mwanamke huyo, ambaye alikuwa na silaha, kukataa amri ya kuiweka chini. Taarifa zimebainisha kuwa mwanamke aliyejeruhiwa ni raia wa Marekani.
Tukio hili limechochea zaidi hasira za wakaazi wa Chicago, ambao tayari walikuwa wameingia mitaani kwa wingi kupinga hatua ya Rais Trump kuingiza jeshi katika jiji lao. Waendesha mashtaka wa serikali kuu mjini humo wametangaza kuwa tayari watu watatu wamekamatwa kwa tuhuma za uchochezi wa ghasia katika kipindi cha siku tatu zilizopita, wakidaiwa kutumia magari yao kuzuia shughuli za maafisa wa serikali.
Mgogoro wa Kikatiba Kati ya Jimbo na Serikali Kuu
Hali imekuwa ya mgogoro wa wazi kati ya uongozi wa jimbo la Illinois na serikali kuu ya Washington. Waziri wa Usalama wa Taifa, Kristi Noem, alitangaza kuwa hali ya Chicago ni mbaya na kwamba serikali itapeleka vikosi maalum vya operesheni (Special Operations Units) ili kurejesha utulivu.
Tangazo hilo lilimfanya Gavana wa Illinois, J.B. Pritzker, kuchemka na kutoa tamko kali la kupinga. "Utawala wa Trump kupitia wizara yake ya vita (Wizara ya Ulinzi) umenipa onyo la mwisho kwamba watapeleka Gadi ya Taifa," alisema Gavana Pritzker. "Kuleta jeshi katika eneo langu kinyume na matakwa ya serikali ya jimbo ni jambo la kipumbavu, la hasira, na ni kinyume kabisa na misingi ya Uamerika."
Hii si mara ya kwanza kwa utawala wa Trump kutumia jeshi la akiba katika miji ya Marekani. Hatua kama hiyo ilishachukuliwa katika miji mingine ikiwemo Los Angeles (LA), Washington D.C., na Memphis, ambapo kote huko ilizua maandamano makali kutoka kwa mamia ya raia wanaopinga kile wanachokiona kama matumizi ya nguvu kupita kiasi dhidi ya raia.