Katika hatua ya kupongeza na kuhamasisha utendaji kazi wa uadilifu, Mkurugenzi wa Halmashauri ya Ushetu mkoani Shinyanga, Hadija Kabojela, amewatunuku motisha ya fedha taslimu wakusanyaji mapato sita waliofanya kazi kwa weledi wa hali ya juu. Wafanyakazi hao kwa pamoja wamefanikiwa kuingiza zaidi ya Shilingi milioni 433.7 kwenye hazina ya halmashauri kwa mwaka wa fedha 2024/2025.
Akizungumza wakati wa hafla fupi ya kuwapongeza wafanyakazi hao kutoka mageti ya Igunda, Mpunze, Kisuke na eneo la machimbo ya Mwabomba, Kabojela alisisitiza kuwa mapato yanayokusanywa ndiyo moyo na chachu ya maendeleo kwa wananchi. Aliwaonya vikali watumishi wote kujiepusha na vitendo vya "udokozi" na ubadhirifu, akisema vitendo hivyo vinakwamisha utekelezaji wa miradi muhimu ya jamii.
"Fedha hizi mnazokusanya kwa jasho ndizo zinajenga barabara, vituo vya afya na shule zetu. Hatutasita kumchukulia hatua kali yeyote atakayejaribu kuhujumu juhudi hizi. Lengo la motisha hii ni kuwatia moyo ninyi mliofanya vizuri na kuwapa changamoto wengine waige mfano wenu," alisema Kabojela.
Mashujaa wa Mapato Waliotunukiwa ni:
Waliopokea motisha hiyo ni pamoja na Mashaka Jifunge wa geti la Igunda, aliyekuwa kinara kwa kukusanya Shilingi milioni 122.7, akifuatiwa na Kashindye Ngele wa geti la Mpunze aliyeingiza Shilingi milioni 102.8, na Ambroz John kutoka geti la Kisuke aliyekusanya Shilingi milioni 70.1.
Wengine waliopongezwa kwa kazi nzuri na kupewa motisha ya Shilingi 200,000 kila mmoja ni Mashaka Tangu (geti la Mpunze) aliyekusanya Shilingi milioni 54.4, Theonas Banyenda (machimbo ya Mwabomba) aliyekusanya zaidi ya Shilingi milioni 43, pamoja na Paul Ngusa (geti la Kisuke) aliyeingiza Shilingi milioni 40.4.
Mkurugenzi Kabojela alihitimisha kwa kusema kuwa zawadi hizo zitaendelea kutolewa ili kuchochea ari ya kazi na kuhakikisha kila senti ya umma inakusanywa na kutumika kama ilivyopangwa.