Jana, tarehe 16 Mei 2025, wauguzi katika Manispaa ya Shinyanga walifanya maadhimisho ya Siku ya Wauguzi Duniani kwa njia ya kipekee, wakionyesha vitendo vya huruma na upendo kwa wagonjwa. Tukio hili lililenga kumuenzi Florence Nightingale, anayetambulika kama mwanzilishi wa taaluma ya uuguzi duniani na alama ya huruma katika huduma za afya. Maadhimisho hayo yalifanyika katika Hospitali ya Manispaa ya Shinyanga, ambapo wauguzi walipata fursa ya kuwatembelea wagonjwa waliolazwa, kuwafariji na kuwapatia zawadi mbalimbali ikiwa ni pamoja na sabuni za kuogea na mafuta ya kujipaka.
Mkurugenzi wa Manispaa ya Shinyanga, Bwana Alexius Kagunze, ndiye aliyekuwa mgeni rasmi katika maadhimisho hayo. Katika hotuba yake, Bwana Kagunze aliwapongeza kwa dhati wauguzi wote kwa kazi ngumu na muhimu wanayoifanya kila siku, akisisitiza jinsi wanavyohudumia wagonjwa kwa moyo wa kujitolea na huruma, licha ya changamoto nyingi wanazokumbana nazo katika utekelezaji wa majukumu yao. "Natambua na kuthamini sana huduma bora mnazozitoa. Binafsi, nilipopata changamoto ya kiafya hivi karibuni, nilihudumiwa kwa weledi mkubwa hapa hospitalini. Wengi wenu hamkunifahamu kama Mkurugenzi, lakini mlinitibu kwa upendo na uangalifu uleule mnaowapa wagonjwa wengine. Hii inadhihirisha kuwa mnafanya kazi yenu bila upendeleo wowote," alisema Bwana Kagunze, akishangiliwa na wauguzi.
Aliendelea kueleza kuwa Serikali inatambua mchango wa wauguzi na itaendelea kufanya jitihada za kuboresha mazingira yao ya kazi. Alitolea mfano ukarabati mkubwa uliofanywa katika Hospitali ya Manispaa hiyo kwa ufadhili wa Serikali, na pia akakumbushia tangazo la hivi karibuni la Rais Dk. Samia Suluhu Hassan kuhusu nyongeza ya mishahara kwa watumishi wa umma, akisema kuwa hiyo ni ishara ya jinsi serikali inavyowajali watumishi wake, wakiwemo wauguzi.
Kama ishara ya kuwathamini zaidi, Bwana Kagunze alitangaza ofa maalum ya viwanja kwa wauguzi hao kupitia Ofisi yake. Aliwahimiza wauguzi wote wenye nia ya kumiliki ardhi kufika ofisini kwake ili waweze kupatiwa viwanja hivyo kwa utaratibu rahisi wa malipo ya awamu. Alisema lengo la mpango huo ni kuwawezesha wauguzi kujenga makazi bora na imara kwa ajili yao na familia zao.
Kwa upande wake, Kaimu Muuguzi Mkuu wa Manispaa ya Shinyanga, Bi. Anna Maganga, alitoa shukrani za dhati kwa Mkurugenzi wa Manispaa kwa kutambua na kuthamini mchango wa wauguzi, na hasa kwa kutoa fursa hiyo adhimu ya viwanja. Aliwaasa wauguzi wenzake kuchangamkia fursa hiyo ili waweze kujipatia maeneo ya ujenzi. Bi. Maganga alisisitiza kuwa taaluma ya uuguzi ni zaidi ya kazi; ni wito na sadaka. Aliahidi kuwa wauguzi wataendelea kutoa sadaka hiyo kwa uaminifu na upendo, wakifuata nyayo za Florence Nightingale, kwa kuwahudumia wagonjwa wote kwa moyo mmoja na bila kuchoka.
Naye Muuguzi Mkuu wa Mkoa wa Shinyanga, Bi. Frola Kajumla, aliongeza kuwa taaluma ya uuguzi inastahili kutambuliwa zaidi, kuungwa mkono na kuwekewa mazingira bora zaidi ya kufanyia kazi. Alikumbusha kuwa wauguzi ndio wanaotumia muda mwingi zaidi na wagonjwa, wakiwapa huduma za kimatibabu na faraja ya kihisia, hivyo ustawi wao ni muhimu kwa ubora wa huduma za afya kwa ujumla.
Baadhi ya wagonjwa waliokuwa wamelazwa katika Hospitali ya Manispaa ya Shinyanga walipata fursa ya kutoa shukrani zao. Mmoja wao, Bi. Matha Mhoja, aliyekuwa katika Wodi ya wazazi, aliwashukuru wauguzi kwa huduma nzuri na uangalifu alioupata, akisema kuwa kutokana na huduma hizo bora, amejifungua mtoto wake salama na wote wawili wana afya njema.
Ingawa Siku ya Wauguzi Duniani huadhimishwa rasmi kila mwaka ifikapo tarehe 12 Mei, wauguzi wa Manispaa ya Shinyanga walichagua kuifanya siku ya Mei 16, 2025 kuwa ya kipekee kwa ajili ya kumkumbuka na kumuenzi kwa vitendo muasisi wa taaluma yao adhimu, Florence Nightingale, ambaye alibadilisha taswira ya uuguzi duniani kwa kusisitiza usafi, huruma, na weledi.