Ushirikiano wa kimkakati baina ya mamlaka za udhibiti wa sekta ya mafuta na gesi za Tanzania Bara (PURA) na Zanzibar (ZPRA) umepongezwa na Serikali ya Mapinduzi ya Zanzibar, ikielezwa kuwa ni mfano wa kuigwa katika kuendeleza sekta hiyo muhimu kitaifa.
Pongezi hizo zimetolewa na Katibu Mkuu wa Wizara ya Uchumi wa Buluu na Uvuvi Zanzibar, Kapteni Hamad Bakar Hamad, alipofanya ziara katika banda la Mamlaka ya Udhibiti Mkondo wa Juu wa Petroli (PURA) kwenye Maonesho ya 49 ya Biashara ya Kimataifa (Sabasaba) jana, Julai 8, 2025.
Akiwa katika banda hilo, Kapteni Hamad alipata maelezo ya kina kutoka kwa Mjiolojia Mwandamizi wa PURA, Ebeneza Mollel, kuhusu jinsi Hati ya Makubaliano (MoU) iliyosainiwa mwaka 2022 kati ya taasisi hizo mbili inavyotekelezwa kwa vitendo.
Mollel alieleza kuwa ushirikiano huo unalenga kubadilishana uzoefu na kujengeana uwezo katika maeneo muhimu kama vile:
- Usimamizi wa data za utafutaji wa mafuta na gesi.
- Ukaguzi wa gharama za miradi ya uwekezaji.
- Utungaji wa sheria, kanuni na miongozo ya sekta.
- Usimamizi wa shughuli za mkondo wa juu na ushirikishwaji wa wazawa (local content).
Alithibitisha kuwa ushirikiano huo ni hai, akitolea mfano kikao cha sita cha pamoja cha menejimenti za taasisi hizo kilichofanyika Julai 1, 2025, kujadili utekelezaji wa makubaliano hayo kwa mwaka wa fedha 2024/25.
Baada ya maelezo hayo, Katibu Mkuu Hamad alionyesha kuridhishwa kwake na hatua zilizofikiwa, akisema ushirikiano huo ni muhimu kwa mustakabali wa sekta ya nishati kwa pande zote mbili za Muungano. "Nawapongeza sana kwa kazi nzuri mnayoifanya. Ni muhimu muendelee kuyaenzi na kuyadumisha mashirikiano haya yenye tija kwa taifa letu," alisema Kapteni Hamad.
Ushirikiano huu unatajwa kuwa muhimu hasa katika kipindi hiki ambacho Tanzania inajiandaa na miradi mikubwa ya nishati, na unahakikisha kuwa pande zote mbili za Muungano zinatembea kwa mwendo mmoja.