Chama cha Ushirika wa Akiba na Mikopo (SACCOS) cha Watumishi wa Wizara ya Maliasili na Utalii (MNRT SACCOS LTD) kimeonyesha mafanikio makubwa katika kipindi cha mwaka mmoja, kikitajwa kuwa mfano wa kuigwa katika kuboresha maslahi ya watumishi serikalini. Hali hii inadhihirishwa na taarifa ya utoaji wa mikopo yenye thamani inayozidi Shilingi Bilioni 1.2 kwa wanachama wake ndani ya mwaka mmoja.
Hayo yalibainishwa wakati wa ufunguzi wa Mkutano Mkuu wa tano (5) wa chama hicho, uliofanyika katika ukumbi wa mikutano wa Shirika la Hifadhi za Taifa (TANAPA) jijini Dodoma, tarehe 25 Oktoba 2025.
Akifungua rasmi mkutano huo, Kaimu Katibu Mkuu wa Wizara ya Maliasili na Utalii, Bw. Bernard Marcelline, ambaye pia ni Mkurugenzi Mkuu wa Idara ya Utawala na Usimamizi wa Rasilimaliwatu, alipongeza uongozi na wanachama kwa hatua hiyo kubwa. Alisema kiasi hicho kikubwa cha fedha si tu kimewanufaisha wanachama zaidi ya 700 wa chama hicho, bali kimeingia moja kwa moja kwenye mzunguko wa uchumi na kuchochea shughuli mbalimbali za maendeleo katika maeneo wanamoishi.
Bw. Marcelline alifafanua uhusiano muhimu kati ya ustawi wa kifedha wa mfanyakazi na utendaji wake wa kazi. Alieleza kuwa uwepo wa SACCOS hii imara umekuwa chachu ya kuongeza tija na ufanisi katika utendaji kazi wa kila siku. Alisema uhakika wa kipato na kuwepo kwa msaada wa kifedha wakati wa dharura, kunawafanya watumishi kuwa watulivu na kuweka akili zao katika majukumu ya kitaifa.
"Kutoa mikopo ya zaidi ya bilioni 1.2 kwa mwaka ni ishara kwamba fedha hizi zimefika kwa wanachama na zinatumika kikamilifu katika shughuli za kiuchumi," alisema Bw. Marcelline.
Kufuatia mafanikio hayo, Kaimu Katibu Mkuu alitumia fursa hiyo kuwahimiza watumishi wengine wa wizara ambao bado hawajachukua hatua ya kujiunga, kufanya hivyo mara moja. Alisisitiza kuwa MNRT SACCOS inakua kwa kasi ya kuridhisha na inatoa fursa nzuri ya kujiwekea akiba na kupata mitaji.
Hata hivyo, alitoa angalizo muhimu kwa wakopaji wote. Aliwasihi kutumia fedha hizo za mkopo kwa malengo mahsusi waliyojiwekea wakati wa kuomba. Zaidi ya yote, alikazia suala la urejeshaji wa mikopo hiyo kwa wakati ili kuendelea kujenga uaminifu na kuwezesha mfuko wa chama kukua na kuhudumia wengine zaidi.
Mafanikio ya SACCOS hiyo hayakuishia kwenye mikopo pekee. Akitoa taarifa ya utendaji, Mwenyekiti wa MNRT SACCOS LTD, Bw. Wilfred Msemo, alithibitisha kuwa chama kiko imara kifedha. Alitangaza kuwa SACCOS hiyo imefanikiwa kutoa gawio la kuvutia la Shilingi Milioni 76 kwa wanachama wake wote, ikiwa ni faida iliyopatikana. Vilevile, Bw. Msemo alieleza kuwa chama kimeendelea kukua na kufanikiwa kuingiza wanachama wapya 138 katika kipindi hicho, huku kikiendelea kutekeleza wajibu wake kwa jamii kwa kuchangia katika shughuli mbalimbali za kijamii.