Wakazi wa Mkoa wa Tanga wameonyesha furaha kubwa kufuatia ziara ya Rais Dkt. Samia Suluhu Hassan, wakieleza kuwa wanathamini sana juhudi zake za kuleta maendeleo katika mkoa wao. Wananchi hao wameeleza kuridhishwa na hatua za serikali kuboresha bandari ya Tanga, ambayo wanaamini itafungua fursa nyingi za ajira na kuchochea ukuaji wa uchumi wa mkoa.
Moja ya ombi kuu la wananchi hao ni kuongezwa kwa idadi ya Wakala wa meli ili kuongeza wigo wa ajira kwa vijana na kuongeza mapato ya serikali. Eveline Mshana, mkazi wa Tanga, alisema, "Tunamshukuru sana Mama kwa kututembelea hapa Tanga na kwa maboresho yanayoendelea katika bandari yetu. Tunaiomba serikali iongeze Wakala wa meli ili vijana wetu wapate ajira kwa wingi."
Aisha Mkamba, mkazi mwingine, aliongeza kuwa kuboreshwa kwa bandari hiyo ni fursa kubwa kwa wananchi. "Tumefurahi sana Rais wetu kututembelea. Maboresho ya bandari yanatusaidia kupata ajira, hivyo tunawaomba wawekezaji waje kwa wingi ili kuendeleza maendeleo ya mkoa wetu," alisema.
Wananchi hao wana matumaini makubwa kuwa uwekezaji unaoendelea katika bandari ya Tanga utachochea ustawi wa uchumi wa mkoa na taifa kwa ujumla. Bandari ya Tanga, ambayo ina historia ndefu kama lango la biashara, imekuwa ikifanyiwa maboresho makubwa ili kuendana na mahitaji ya soko la kisasa. Maboresho haya yanajumuisha kuongeza kina cha bandari ili kuruhusu meli kubwa kutia nanga, kuboresha miundombinu ya kuhudumia mizigo, na kuongeza vifaa vya kisasa vya kupakia na kupakua mizigo.
Mbali na kuongeza fursa za ajira, maboresho ya bandari yanatarajiwa kuongeza mapato ya serikali kupitia ushuru na ada mbalimbali. Pia, itavutia wawekezaji wengi kutoka ndani na nje ya nchi, ambao wataanzisha viwanda na biashara zinazohusiana na shughuli za bandari. Hii itachangia katika ukuaji wa uchumi wa mkoa na taifa kwa ujumla.
Wananchi wa Tanga wanaamini kuwa ujio wa Rais Dkt. Samia Suluhu Hassan ni ishara ya dhamira ya serikali katika kuleta maendeleo endelevu katika mkoa wao. Wanaamini kuwa serikali itasikiliza ombi lao la kuongeza Wakala wa meli na kuchukua hatua za kuhakikisha kuwa maboresho ya bandari yanaleta manufaa kwa wananchi wote.