Serikali katika Wilaya ya Mkuranga imetoa wito kwa wafugaji wa nyuki kubadilisha mtazamo wao wa kibiashara na kuwekeza katika kuongeza thamani ya mazao yatokanayo na ufugaji wa nyuki. Hatua hii inalenga kuwawezesha wafugaji kupata mapato makubwa zaidi kutokana na shughuli zao.
Wito huu ulitolewa na Katibu Tawala wa Wilaya ya Mkuranga, Bwana Omary Mwanga, wakati wa maadhimisho ya Siku ya Nyuki yaliyoandaliwa na wilaya hiyo. Maadhimisho hayo yaliwakutanisha vikundi mbalimbali vya wafugaji nyuki kutoka ndani ya wilaya.
Bwana Mwanga alishauri wafanyabiashara wanaojihusisha na zao la nyuki kuangalia zaidi namna ya kuongeza thamani katika biashara zao. Alisisitiza umuhimu wa kubadilisha mtazamo kwa kuzingatia ubunifu na kuongeza thamani ya bidhaa zinazotokana na nyuki ili kuongeza kipato chao.
"Isiwe tu asali pekee, bali hata vile vitu vingine vinavyopatikana kwenye asali tuweze kuvitumia. Wafanyabiashara wanapaswa kuviweka hivi kwenye mipango yao ya kuongeza thamani ili tuweze kuongeza uzalishaji na ubunifu. Hii itatusaidia kujijenga imara katika ushindani wa kibiashara," alisema Bwana Mwanga.
Aidha, aliwahimiza wafugaji kujitangaza zaidi ili kupata wateja wengi. Aliongeza kuwa serikali inaendelea kutafuta njia za kuwasogezea fursa mbalimbali zinazopatikana katika sekta ya ufugaji wa nyuki.
Katibu Tawala huyo alipendekeza kubadilisha mfumo wa maadhimisho ya siku kama hiyo ili yaweze kuwa na manufaa zaidi kwa washiriki. Aliona ni vyema maadhimisho yajayo yawe kama vikao kazi ambavyo vinaweza kuzaa maazimio yanayolenga kuinua sekta ya ufugaji wa nyuki.
Alieleza kuwa katika maadhimisho kama hayo, wataalamu wanapaswa kupata nafasi ya kutoa elimu na ujuzi kwa wafugaji wa nyuki ili kuboresha shughuli zao na kuleta mabadiliko chanya ya kiuchumi kwao.
Awali, Kaimu Mkuu wa Kitengo cha Uhifadhi na Utunzaji Misitu wa Wilaya ya Mkuranga, Bwana Asted William, alieleza kuwa katika kipindi cha miaka mitano, wamefanikiwa kuwa na mizinga ya kisasa 1,015 na mizinga ya kienyeji 72, ambayo kwa ujumla imezalisha kilo 3,000, sawa na tani tatu za asali.
Kitengo hicho kilimshukuru Rais Samia Suluhu Hassan kwa kuipa kipaumbele sekta ya ufugaji nyuki, hatua ambayo imewezesha asali ya Tanzania kuuzwa katika masoko ya kimataifa, ikiwemo China na nchi nyingine duniani.
Sambamba na hilo, Bwana Asted alifahamisha kuwa Tanzania imepewa heshima ya kuwa mwenyeji wa mkutano mkubwa utakaowakutanisha wadau wa ufugaji nyuki kutoka duniani kote.
Hata hivyo, aliongeza kuwa kwa sasa wanakabiliwa na changamoto ya mabadiliko ya tabianchi, ambayo yanachangiwa na vitendo vya uchomaji moto ovyo karibu na mizinga na mbinu zisizo sahihi za uvunaji asali.