Tangu alipoingia madarakani mwaka 2021, akichukua nafasi ya Hayati Rais John Pombe Magufuli, Rais Samia Suluhu Hassan ameweka wazi dhamira yake ya kuendeleza miradi na mipango iliyoanzishwa na mtangulizi wake kupitia kaulimbiu yake mashuhuri ya 'Kazi Iendelee'. Katika kipindi chake cha miaka minne, Tanzania imeshuhudia kasi kubwa ya utekelezaji wa miradi mikubwa, mingi ikiwa imerithiwa na kukamilishwa, huku mingine ikianza kutoa matunda yanayoonekana wazi.
Moja ya mafanikio makubwa ni kukamilika kwa Mradi wa Bwawa la Umeme la Mwalimu Nyerere (JNHPP), ambao Rais Samia aliukuta ukiwa bado haujamalizika. Chini ya uongozi wake, mradi huo umekamilika na sasa umeanza kuzalisha umeme wa uhakika, jambo lililopunguza kwa kiasi kikubwa tatizo la mgawo wa umeme lililokuwa likiisumbua nchi. Ingawa changamoto ndogondogo zipo, upatikanaji wa umeme sasa umekuwa imara na kuna mipango ya kuuza umeme ziada kwa nchi jirani, jambo litakaloongeza mapato ya taifa.
Mradi mwingine wa kimkakati ni Reli ya Kisasa (SGR). Sehemu kubwa ya mradi huu, ambayo pia ilikuwa haijakamilika kikamilifu, sasa inatoa huduma za usafiri kutoka Dar es Salaam, Morogoro hadi Dodoma. Watu wengi wameanza kutumia usafiri huu kutokana na uhakika wake na uwezo wa kuwafikisha haraka. Hali hii imerahisisha maisha kwa wakazi wengi, hasa wale wanaosafiri mara kwa mara kati ya miji hii mikubwa. Kwa mfano, mfanyakazi anaweza kulala Dar es Salaam na kuwahi kufika kazini Dodoma bila kuchelewa, jambo ambalo lilikuwa gumu kufikirika hapo awali. Maendeleo haya yamevutia macho ya mataifa jirani, yakionyesha kupongeza hatua zinazopigwa na Tanzania.
Uwanja wa Ndege wa Kimataifa wa Mwalimu Nyerere nao umefanyiwa maboresho makubwa na sasa unatoa taswira mpya na ya kisasa kwa wageni wanaoingia nchini. Kwa miundombinu yake ya kisasa na vifaa vya kisasa vya uhakiki wa taarifa, imerahisisha taratibu za uhamiaji na kutoa picha nzuri ya nchi. Sambamba na hayo, uboreshaji wa miundombinu ya barabara unaendelea kote nchini, kuanzia barabara za juu hadi zile za mwendokasi. Matokeo ya maboresho haya yameonekana wazi, kwani barabara nzuri zimefungua fursa nyingi za kibiashara na kupunguza msongamano wa magari, hivyo kuokoa muda mwingi uliokuwa unapotea barabarani na sasa unatumika kwa shughuli za uzalishaji.
Katika kipindi chake cha uongozi, Rais Samia amesisitiza sana matumizi ya nishati safi kwa lengo la kuwaondoa Watanzania kwenye matumizi ya kuni na mkaa, ambayo yamekuwa yakichangia kwa kiasi kikubwa uharibifu wa mazingira. Juhudi hizi zimezaa matunda kwani Watanzania wengi, hasa wale wanaoishi mijini, wamehamia kwenye matumizi ya gesi kwa ajili ya kupikia. Hata migahawa mingi, mama lishe na taasisi kubwa zimeacha kutumia kuni na mkaa, na badala yake zimetumia gesi, hivyo kupunguza moshi na hewa chafu hatari kwa afya.
Katika upande wa mashirika ya umma, Rais Samia amefanya mageuzi makubwa kwa kuyawezesha kujiendesha yenyewe bila kutegemea ruzuku kutoka serikalini. Matokeo yake, mashirika haya sasa yanaweza kutoa gawio kwa serikali, jambo linaloimarisha uchumi wa taifa. Mazingira mazuri ya uwekezaji pia yamewavutia wawekezaji wengi wa ndani na nje kuja kuwekeza nchini, hatua inayochangia ukuaji wa uchumi na ufunguaji wa fursa nyingi za ajira kwa vijana wa Kitanzania.
Sekta ya afya pia imepiga hatua kubwa chini ya uongozi wa Rais Samia. Nchi sasa ina wataalamu bingwa na vifaa vya kisasa vya matibabu, jambo lililosababisha kupungua kwa idadi ya wagonjwa wanaokwenda kutibiwa nje ya nchi. Hii imepunguza mzigo mkubwa wa gharama za matibabu kwa serikali, na kuongeza imani ya wananchi katika huduma za afya zinazotolewa nchini.