Bodi ya Wakurugenzi na Menejimenti ya Shirika la Maendeleo ya Petroli Tanzania (TPDC) imefahamisha umma kuwa ujenzi wa kituo kikubwa cha kushindilia na kujaza gesi asilia (Compressed Natural Gas - CNG) umefikia hatua za mwisho na unatarajiwa kuanza kutoa huduma kwa wananchi hivi karibuni.
Taarifa hii ilitolewa tarehe 3 Machi, 2025, jijini Dar es Salaam na Mkurugenzi wa Mipango na Uwekezaji wa TPDC, Derick Moshi, kwa niaba ya Mkurugenzi Mkuu wa shirika hilo, Mussa Makame. Moshi alieleza kuwa hatua za mwisho za kuhakikisha usalama wa kituo hicho zinaendelea kwa kasi, ikiwa ni pamoja na ukaguzi wa mifumo mbalimbali ili kuzuia uvujaji wa gesi na kuhakikisha usalama wa watumiaji.
"Kituo kimekamilika kwa zaidi ya asilimia 90, na kwa sasa tunashughulika na hatua za mwisho za kuhakikisha kila kitu kiko salama na kinafanya kazi vizuri. Gesi tayari ipo katika kituo, lakini hatujaanza kujaza magari kwa sababu tunataka kujiridhisha zaidi kabla ya kuanza kazi rasmi," alisema Moshi. Aliongeza kuwa kituo hicho kitakuwa tayari kabla ya kumalizika kwa mwezi huu, na uzinduzi rasmi utafanyika mara baada ya kukamilisha hatua zote za mwisho.
Akiwakilisha Mwenyekiti wa Bodi ya Wakurugenzi wa TPDC, Balozi Ombeni Sefue, mjumbe wa bodi Paul Makanza alisema kuwa bodi imeridhishwa na maendeleo makubwa yaliyopatikana katika mradi huo na ina matarajio makubwa kuwa utaisaidia serikali kupunguza gharama za ununuzi wa mafuta kutoka nje ya nchi.
"Napongeza Menejimenti ya TPDC kwa kazi nzuri wanayoifanya kuhakikisha mradi huu muhimu unakamilika kwa wakati uliopangwa. Pia, kutakuwa na workshop itakayomilikiwa na Chuo Kikuu, jambo ambalo linaongeza thamani kubwa ya mradi huu," alisema Makanza. Alisisitiza kuwa mradi huo ni muhimu sana kwa taifa kwa kuwa gesi asilia ni mbadala mzuri wa mafuta ambayo yanaagizwa kutoka nje kwa gharama kubwa, na hivyo utasaidia kupunguza matumizi makubwa ya fedha za kigeni. Aliongeza kuwa mradi unavyozidi kupanuka, utasambaa nchi nzima na kusaidia kukuza uchumi wa taifa kwa ujumla.
Kwa upande wake, Naibu Katibu Mkuu wa Wizara ya Nishati, Dk. James Mataragio, alieleza kuwa kituo hicho kinachojengwa katika eneo la Ubungo, jijini Dar es Salaam, kimegharimu shilingi bilioni 14.5 (takriban Dola za Marekani milioni 5.8).
Kukamilika kwa mradi huu kunatarajiwa kuongeza matumizi ya gesi asilia kama nishati mbadala kwa magari, kupunguza gharama za uendeshaji kwa watumiaji wa magari, na kuimarisha sekta ya nishati nchini Tanzania. Serikali inaona mradi huu kama hatua muhimu katika jitihada zake za kupunguza gharama za mafuta na kukuza uchumi wa nchi.