Katika kile kinachoonekana kama 'kuanza na gia kubwa' mara tu baada ya kushika hatamu, Waziri wa Viwanda na Biashara, Mhe. Judith Kapinga, amefanya ziara ya kimkakati yenye lengo la kuimarisha 'ndoa' ya kiuchumi kati ya Serikali na Sekta Binafsi. Waziri Kapinga ametembelea Makao Makuu ya Shirikisho la Wenye Viwanda Nchini (CTI) jijini Dar es Salaam na kuwahakikishia vigogo hao kuwa serikali ya Awamu ya Sita imedhamiria kutimiza ndoto ya Tanzania ya Viwanda kwa vitendo.
Ziara hiyo, iliyofanyika jana, imetafsiriwa na wadadisi wa mambo kama ishara ya wazi ya utayari wa Waziri huyo kutatua kero sugu zinazokwamisha uzalishaji nchini. Kapinga hakuenda CTI kwa ajili ya kupiga picha, bali "kufungua faili" la maagizo na maono ya Rais Dk. Samia Suluhu Hassan, yanayolenga kukuza uchumi kupitia uzalishaji wa ndani.
Kwanini CTI? Akifafanua sababu za kuchagua CTI kama kituo chake cha kwanza cha kazi, Waziri Kapinga alisema, "Huwezi kuzungumzia uchumi wa nchi bila kuwagusa wenye viwanda. CTI inabeba wadau zaidi ya 18,000. Hawa ndio injini ya ajira na walipa kodi wakubwa. Nimekuja hapa kuwahakikishia kuwa mlango wangu uko wazi na ushirikiano wetu utakuwa wa 'chuma na zege'."
Alisisitiza kuwa lengo la serikali kuelekea Dira ya Taifa ya 2030 ni kuhakikisha viwanda vya Tanzania vinapata mazingira wezeshi ili bidhaa za ndani ziweze kushindana katika soko la Afrika Mashariki (EAC), SADC na soko huru la Afrika (AfCFTA).
Ahadi ya Siku 100 na Utatuzi wa Kero Katika kikao hicho cha ndani kilichotawaliwa na uwazi, Waziri Kapinga aliwasilisha mpango kazi unaoendana na ahadi za Rais Samia za siku 100 za mwanzo wa muhula mpya. Alibainisha kuwa serikali inatambua changamoto zilizopo, zikiwemo za kikodi na miundombinu, na kwamba mikakati imesuka kuzimaliza ili viwanda viendelee kupumua na kutoa ajira kwa vijana.
"Tumezungumza lugha moja na wenye viwanda. Wamenipa orodha ya mambo mahsusi yanayohitaji ufumbuzi, na nimewapa neno la serikali kwamba tutayafanyia kazi haraka. Jukumu langu ni kuondoa vikwazo ili biashara istawi," aliongeza Kapinga.
Tenga Amwaga Maua Kwa upande wake, Mkurugenzi Mtendaji wa CTI, Leodegar Tenga, amempongeza Waziri Kapinga kwa hatua hiyo ya haraka ya kuwatembelea. Tenga, ambaye ni kiongozi mwenye busara na uzoefu, alikiri kuwa ushirikiano uliopo sasa kati ya serikali na sekta binafsi unatia moyo.
"Tunamshukuru sana Rais Samia kwa uteuzi huu. Waziri amekuja mapema, ametusikiliza, na tunaona nia ya dhati. Tunajua mambo hayaendi kwa siku moja, mabadiliko yanahitaji subira, lakini mwelekeo (trend) tunaouona ni mzuri sana. Wenye viwanda tuna imani kubwa na uongozi huu," alisema Tenga.
Ziara hii inatazamiwa kuleta hamasa mpya kwa wawekezaji wa ndani na nje, ikithibitisha kuwa Tanzania iko tayari kwa biashara na inalinda maslahi ya wazalishaji wake.