Katika hatua isiyo ya kawaida inayounganisha imani na uchumi, zaidi ya waumini 2,000 wa Kanisa la Christ Mandate and Power Ministries International jijini Dar es Salaam wamehitimu mafunzo ya kisasa ya ufugaji wa kuku, mpango unaolenga kuwapa mbinu za kujikwamua kiuchumi na kuondokana na utegemezi.
Mafunzo hayo, yaliyoendeshwa na kampuni ya Sab Investment, yamepokelewa kwa shauku kubwa, huku Mkurugenzi wa kampuni hiyo, Saida Bwanaheri, akisisitiza umuhimu wa taasisi za kidini kuwa chachu ya maendeleo ya kiuchumi kwa waumini wake, badala ya kubaki katika majukumu ya kiroho pekee.
Akizungumza wakati wa mahafali hayo, Bwanaheri alisema, "Ni muhimu sana kwa taasisi za kidini kuongoza njia katika kuhamasisha waumini wao kujihusisha na shughuli za kiuchumi. Imani na kazi vinapaswa kwenda sambamba ili kupunguza ugumu wa maisha na kujenga jamii imara." Aliongeza kuwa ushirikiano kati ya sekta binafsi na nyumba za ibada unaweza kuleta mapinduzi makubwa ya kiuchumi nchini.
Mpango huu unatajwa kuwa mkombozi hasa kwa kundi la vijana. Afisa Masoko wa Sab Investment, Charles Kimario, alieleza kuwa vyeti walivyopokea wahitimu si tu karatasi, bali ni ufunguo wa kuwafungulia milango ya kujitegemea na kujipatia kipato halali kupitia sekta ya kilimo-biashara. "Tunatoa wito kwa vijana kote nchini kuchangamkia fursa zilizopo katika ufugaji wa kuku. Sekta hii ina uwezo wa kukuza uchumi wa mtu mmoja mmoja na taifa kwa ujumla," alisema Kimario.
Ushirikiano huu umepongezwa kama mfano wa kuigwa. Balozi wa Sab Investment, Dariana Mushi, aliwapongeza viongozi wa kanisa hilo kwa kuwa na maono na kuruhusu waumini wao kupata ujuzi utakaobadili maisha yao moja kwa moja. Alisema mafunzo kama haya si tu yanatoa maarifa, bali yanachangia katika kuifanya sekta ya ufugaji nchini kuwa ya kisasa na yenye tija zaidi. Wahitimu hao sasa wameingia mtaani wakiwa na silaha ya maarifa tayari kwa ajili ya mapambano dhidi ya umaskini.