Maadhimisho ya wiki nne ya mradi wa NOURISH, yaliyofanyika katika halmashauri 10 nchini Tanzania, yamehitimishwa kwa mafanikio makubwa katika Wilaya ya Babati, mkoani Manyara. Kilele cha maadhimisho hayo kiliwakutanisha maelfu ya wakulima pamoja na wadau muhimu katika sekta ya kilimo, ambapo walipata fursa ya kujifunza mbinu bora za kilimo chenye tija na umuhimu wa lishe bora kwa afya na ustawi wa jamii.
Akizungumza katika kijiji cha Endanoga, ambako sherehe za kuhitimisha maadhimisho hayo zilifanyika, Ofisa Mradi wa NOURISH kutoka Shirika la RECODA, Bi. Salome James, alieleza kuwa mradi huo ulianza kutekelezwa Babati mwishoni mwa mwaka 2024 na umepiga hatua kubwa katika kuwawezesha wakulima. Kupitia mashamba darasa, wakulima wamejifunza kwa vitendo kanuni za kilimo kinachozingatia tija na kustahimili athari za mabadiliko ya tabianchi. Aidha, mradi umefanikisha kuwaunganisha wakulima wadogo na kampuni zinazozalisha na kusambaza pembejeo bora za kilimo, hatua ambayo inatarajiwa kuongeza uzalishaji na ubora wa mazao.
“Hadi sasa, tumeweza kuanzisha jumla ya vikundi 75 vya kilimo, ambavyo vina wanachama 2,346. Pia, tumekuwa na mashamba darasa 57 ambayo yametoa mafunzo kwa wakulima. Katika kuhakikisha upatikanaji wa mbegu bora, tumesambaza pingili 40,000 za viazi lishe kwa lengo la kuzalisha mbegu bora zaidi katika ngazi ya kata,” alisema Bi. Salome.
Kwa upande wake, Katibu Tawala wa Wilaya ya Babati, Bw. Khalfan Matipula, aliupongeza mradi wa NOURISH kwa kuongeza ujuzi kwa wahudumu wa afya ngazi ya jamii. Alisema kuwa wahudumu hao wamekuwa mstari wa mbele katika kutoa elimu kuhusu afya na lishe bora katika jamii, jambo ambalo linasaidia kupunguza tatizo la utapiamlo, hasa udumavu kwa watoto. Bw. Matipula aliwahimiza wakulima washiriki wa mradi kuwa mabalozi wa mabadiliko kwa kutumia elimu waliyoipata katika kaya zao na kushirikiana kikamilifu na wataalamu wa kilimo, wakulima viongozi, na wahudumu wa afya.
“Maendeleo na maisha bora yanapatikana kwa kila mmoja kufanya kazi kwa bidii na kwa kutumia utaalamu uliopatikana. Ninawasihi wataalamu wa ugani kuhakikisha wanawajibika kikamilifu katika kuleta maendeleo kwa kufuata mkondo huu wa mradi wa NOURISH, ambao umeonyesha njia sahihi ya maendeleo vijijini,” alisisitiza Bw. Matipula.
Mradi wa NOURISH unafanya kazi katika vijiji 42 vilivyoko katika kata 10 za Wilaya ya Babati. Katika utekelezaji wake, mashirika yanayoshirikiana yamewezesha maafisa ugani, wahudumu wa afya ngazi ya jamii, na wakulima viongozi ngazi ya kijiji, ambao waliteuliwa na serikali za vijiji na kupewa mafunzo maalum kabla ya kuanza kazi.
Mradi huu unafadhiliwa kwa ukarimu na Shirika la Maendeleo la Norway (Norad) na unasimamiwa na SNV kwa ushirikiano na Farm Africa kupitia RECODA na MIICO. Siku ya wakulima iliyoandaliwa ilikuwa sehemu muhimu ya kuonyesha mafanikio na kuhamasisha ushiriki zaidi.
Lengo kuu la mradi wa NOURISH, ambao unatekelezwa katika mikoa mitano ya Tanzania, ni kuimarisha usalama wa chakula, kuongeza uwezo wa jamii kukabiliana na changamoto za mabadiliko ya tabianchi, na kupunguza kiwango cha utapiamlo nchini. Mafanikio yaliyoonekana Babati yanatoa matumaini kwa mikoa mingine inayofaidika na mradi huu.