Wananchi wa jiji la Dar es Salaam wameonyesha furaha na mwitikio mkubwa kwa kambi maalum ya bure ya uchunguzi wa magonjwa ya moyo iliyoandaliwa na Chuo Kikuu cha Afya na Sayansi Shirikishi Muhimbili (MUHAS) katika kampasi yake ya Mloganzila. Kambi hii imewavutia watu wengi kujitokeza kupima afya zao na kupata ushauri wa kitaalamu.
Kambi hiyo, iliyodumu kwa siku mbili, ilifanyika kama sehemu ya maandalizi ya uzinduzi wa awamu ya pili ya Kituo cha Umahiri cha Jumuiya ya Afrika Mashariki kwa huduma za moyo. Lengo kuu la kambi hiyo lilikuwa ni kuzuia na kugundua mapema magonjwa ya moyo kwa watu wa rika zote, hivyo kuwezesha matibabu ya mapema na kupunguza madhara yanayoweza kujitokeza.
Makamu Mkuu wa Chuo cha MUHAS, Profesa Appolinary Kamuhabwa, alieleza kuwa kambi hii ni moja ya mikakati muhimu ya chuo katika kuhamasisha wananchi kufanya uchunguzi wa mara kwa mara wa afya ya moyo. Alisema kuwa uchunguzi wa mapema unaweza kusaidia sana katika kudhibiti matatizo ya moyo kabla hayajafikia hatua mbaya na kuhatarisha maisha.
“Uchunguzi huu wa bure unawapa fursa watu wengi kujua hali zao za moyo kabla ya kuwa katika hatua mbaya. Tunaamini kuwa hii ni njia bora sana ya kuokoa maisha ya watu kwa gharama nafuu,” alifafanua Profesa Kamuhabwa. Aliongeza kuwa MUHAS imejitolea kuhakikisha inatoa huduma za afya zinazowafikia wananchi wengi iwezekanavyo.
Wananchi waliofika kwa wingi kupima afya zao walitoa pongezi nyingi kwa MUHAS kwa mpango huu. Walisema kuwa kambi hiyo imewasaidia kupata huduma muhimu ambazo wengi wao walikuwa wakiziona kama za gharama kubwa au ngumu kupatikana.
Mzee Mtemi Chitema Mahunguchira, mkazi wa Mbagala, alishukuru sana MUHAS kwa kuwapelekea huduma hii karibu. “Nashukuru sana MUHAS kwa kuleta huduma hii karibu na sisi wananchi. Wengi wetu hatujawahi kupima afya ya moyo kwa sababu ya ukosefu wa elimu au hofu ya gharama kubwa. Hii ni hatua nzuri sana. Ningependa sana kuona programu kama hizi zikifanyika mara kwa mara hata katika vituo vyetu vya afya vya wilaya,” alisema Mzee Chitema kwa furaha.
Naye Bi. Maria Thadeus, mkazi wa Mbezi, alithibitisha kuridhishwa kwake na huduma aliyoipata katika kambi hiyo. “Nimehudumiwa kwa haraka sana na kwa uangalifu mkubwa. Madaktari walinieleza vizuri kuhusu hali yangu ya afya na kunipa ushauri mzuri wa nifanye nini. Kwa kweli nimefarijika sana na nina matumaini ya kuanza kufanya mazoezi sahihi kulingana na ushauri wao,” alisema Bi. Maria.
Kwa upande wa wataalamu wa afya walioshiriki katika kambi hiyo, Bi. Irine Mzokolo, ambaye ni mtaalamu wa fiziolojia na msaidizi wa ufundishaji katika MUHAS, alisema kuwa huduma hiyo ililenga pia watu wenye hali maalum za kiafya. Walitoa elimu na maelekezo kuhusu umuhimu wa kuanza mazoezi kwa mpango maalum uliopangwa kulingana na hali ya afya ya kila mtu.
“Tunawafundisha watu jinsi ya kufanya mazoezi kwa usalama. Wengi wamekuwa wakifanya mazoezi bila kujua hali zao za moyo, jambo ambalo linaweza kuwasababishia matatizo. Kupitia mpango huu, tunawawezesha kuanza safari ya kuwa na afya bora kwa usalama,” alieleza Bi. Mzokolo. Aliongeza kuwa elimu hii itasaidia wananchi kuepuka madhara yanayoweza kutokea kutokana na mazoezi yasiyo sahihi.