Jijini Dar es Salaam, upepo wa kisomi na harufu ya wino mpya vilitawala anga la viwanja vya Maonesho ya 32 ya Kimataifa ya Vitabu Tanzania. Hapa ndipo Waziri wa Habari, Utamaduni, Sanaa na Michezo, mwanazuoni nguli na mzungumzaji mahiri, Profesa Palamagamba Kabudi, alipochagiza mjadala mzito kuhusu mustakabali wa taifa na utamaduni wa kusoma, akitaka Watanzania waachane na kasumba ya kale kwamba "ukitaka kumficha Mwafrika kitu, kiweke kwenye maandishi."
Akizungumza kwa lugha ya picha na yenye mashiko mbele ya mamia ya wadau wa elimu, wachapishaji, na wananchi waliojitokeza katika maonesho hayo, Prof. Kabudi amesisitiza kuwa kitabu sio tu karatasi zilizojazwa wino, bali ni "mashine ya kuchapa fedha" na "dawa ya asili" ya kulinda afya ya akili.
"Ndugu zangu, dunia ya leo ni dunia ya maarifa. Uchumi wa nchi yoyote ile hautegemei tena mali asili pekee, bali unategemea akili zilizoshiba maarifa. Kusoma vitabu kuna mchango mkubwa sana wa kukuza uchumi wetu na kuenzi Utanzania wetu," alieleza Prof. Kabudi kwa hisia kali.
Waziri huyo alienda mbali zaidi na kugusia suala la afya ya akili, ambalo limekuwa changamoto kubwa katika jamii ya sasa kutokana na msukumo wa maisha. Alifananisha usomaji wa vitabu na "Gym ya Ubongo," akisema kuwa mtu anayesoma mara kwa mara huongeza uwezo wa kufikiri (critical thinking), hupanua wigo wa maarifa, na muhimu zaidi, hupunguza msongo wa mawazo (stress).
"Kitabu ni rafiki asiyesaliti. Unaposoma, unajijenga kinidhamu na unaupa ubongo wako nafasi ya kupumua na kutafakari mambo mapya. Hii ni tiba tosha kabisa," aliongeza.
Akigeukia upande wa malezi, Prof. Kabudi alitoa "homewek" nzito kwa wazazi na walezi nchini. Aliwataka kujenga utamaduni wa kuwanunulia watoto vitabu badala ya kuwajaza midoli na 'video games' pekee. Alisisitiza kuwa mtoto anayekua akipenda kusoma, anakuwa mwananchi bora na mbunifu wa kesho.
Kwa upande wa waandishi wa vitabu, ambao ndio wapishi wa chakula hicho cha ubongo, Prof. Kabudi aliwataka "kuacha kuandika kwa mazoea." Alisema soko la vitabu linahitaji ubunifu mpya ili kuwavuta wasomaji wapya. Sambamba na hilo, alihimiza vyama vya wasomaji na wachapishaji kuunganisha nguvu na kuanzisha miradi ya pamoja itakayowapa sifa ya kukopesheka kifedha, ili kukuza tasnia hiyo ambayo ni sehemu muhimu ya Uchumi wa Ubunifu.
Naye Mkurugenzi Mkuu wa Bodi ya Huduma za Maktaba Tanzania (TLSB), Dk. Mboni Luzegea, alizungumzia nafasi ya maktaba kama "Ghala la Utu na Maarifa." Dk. Mboni alibainisha kuwa maktaba ni zaidi ya chumba cha kuhifadhia vitabu; ni daraja linalounganisha vizazi vya kale, vya sasa, na vya baadaye.
"Sisi kama Maktaba Kuu, tumebeba dhamana ya kuhifadhi kumbukumbu za taifa. Tunaendelea kushirikiana na taasisi mbalimbali za elimu kuhakikisha kuwa kazi za waandishi wetu wa Kitanzania hazibaki kwenye rafu tu, bali zinaingizwa katika mifumo ya kidigitali ili ziweze kusomeka duniani kote," alisema Dk. Mboni.
Maonesho hayo ya 32 yamekuwa kielelezo cha kukua kwa sekta ya uandishi na uchapishaji nchini, huku yakitoa fursa kwa Watanzania kujionea hazina ya maarifa inayozalishwa na wazawa.