Serikali imesisitiza waziwazi kwamba Mfuko wa Zaka unapaswa kutumika kwa malengo yake makuu, ambayo ni kutoa misaada kwa watu wenye mahitaji bila kuzingatia tofauti za kidini. Lengo kuu ni kuwafikia na kuwasaidia makundi muhimu kama vile yatima, wajane, maskini, na watu wenye mahitaji maalum, ili kutimiza maana halisi ya Zaka na kuvutia wachangiaji wengi zaidi.
Kauli hiyo ya msisitizo imetolewa na Mkuu wa Mkoa wa Morogoro, Adam Malima, wakati wa Kongamano la Amani kuelekea Uchaguzi Mkuu lililoandaliwa na Taasisi ya Ukumbusho wa Zakkat Tanzania (TAUZAKTA) mjini Morogoro.
Malima alibainisha kwamba matumizi sahihi ya mfuko wa zaka katika kuwafikia walengwa ndiyo njia muhimu ya kutekeleza nguzo ya tatu ya Uislamu. Alisisitiza kuwa fedha hizo hazipaswi kuingizwa katika matumizi mengine ya taasisi, kama vile kufanyia mikutano au shughuli za maendeleo ya ofisi.
“Kama mnaunda mfuko wa kutoa kwa hiari, hilo ni sawa, lakini kama ni mfuko wa Zaka, lazima uwe na utaratibu maalum wa kuwafikia walengwa na si vinginevyo,” alisema Malima. Alionya dhidi ya kuingiza fedha hizo kwenye mambo mengine, akieleza: “Hii itawasaidia kupata wachangiaji wengi sana kwa sababu wataona matokeo halisi ya Zaka katika maisha ya Wahitaji, na si vinginevyo.”
Katika kongamano hilo hilo la amani, Mwenyekiti wa Jumuiya ya Maridhiano na Amani Tanzania (JMAT), Musa Salum, alieleza kusikitishwa kwake na kuibuka kwa viashiria vichache vya uvunjifu wa amani nchini. Licha ya Tanzania kuwa taifa lenye sifa kuu ya amani na utulivu, alisisitiza kuwa amani imesisitizwa na Mungu kupitia mafundisho ya dini zote, na hivyo ni wajibu wa kila raia, hasa vijana, kuitunza.
Salum alitoa wito mzito kwa vijana, akisema: “Vijana ndio walinzi namba moja wa taifa hili.” Alionya kuwa wakitumia vibaya ujana wao kwa kumwaga damu au kushiriki maandamano yasiyo na msingi au kwa maslahi ya wachache, watakuwa wanavunja kiapo cha amani na wataulizwa mbele za Mwenyezi Mungu.
Katika kile kinachoashiria kuunga mkono juhudi za taasisi hiyo, mfuko wa zaka ulizinduliwa rasmi na Mkuu wa Mkoa, Adam Malima. RC Malima alichangia kiasi kikubwa cha fedha cha shilingi milioni tano (TZS 5,000,000) ili kuunga mkono juhudi za kusaidia walio kwenye uhitaji kupitia mfuko huo.