Katika kile kinachodhihirisha kwa vitendo ule msemo wa wahenga "kutoa ni moyo wala si utajiri," Mfuko wa Hifadhi ya Jamii kwa Watumishi wa Umma (PSSSF) umefanya jambo la kishujaa lenye lengo la kuokoa uhai wa kizazi cha sasa na kijacho. Mfuko huo umemwaga vifaa tiba vya kisasa vyenye thamani ya jumla ya Shilingi Milioni 55 katika maeneo mawili nyeti ya Jamhuri ya Muungano wa Tanzania; Manispaa ya Tabora (Bara) na Kituo cha Afya Kizimkazi, Mkoa wa Kusini Unguja (Zanzibar).
Tukio hili adhimu lililofanyika Desemba 3, 2025, limekuja wakati muafaka ambapo serikali ya awamu ya sita imekuwa ikipambana kufa na kupona kuhakikisha inapunguza, kama si kumaliza kabisa, vifo vinavyotokana na uzazi. PSSSF imeeleza wazi kuwa hatua hii si hisani tu, bali ni wajibu wao wa kurudisha fadhila kwa jamii (Corporate Social Responsibility), ikilenga kugusa maisha ya mtanzania wa kawaida ambaye ndiye mchangiaji mkuu wa mfuko huo.
Tabora Yachekelea: Vita Dhidi ya Vifo vya Uzazi
Mkoani Tabora, 'neema' hiyo imepokelewa kwa nderemo na vifijo katika Hospitali ya Manispaa. Mkurugenzi wa Manispaa hiyo, Dk. John Pima, hakuwa na ajizi katika kuupongeza uongozi wa PSSSF. Dk. Pima amesema kitendo hicho ni cha kiungwana na kinaunga mkono moja kwa moja juhudi za Rais katika kuboresha sekta ya afya, hasa katika maeneo ya pembezoni.
Akichagiza hoja hiyo kwa takwimu zisizopingika, Kaimu Mganga Mkuu wa Mkoa wa Tabora, Dk. Elisha Ndakama, amebainisha kuwa vifaa hivyo ni silaha mpya katika vita ya kuokoa maisha.
"Uchungu wa mwana aujuaye mzazi, na sisi tunajua umuhimu wa vifaa hivi. Katika mwaka wa fedha 2024/25, tulifanikiwa kuwahudumia akina mama 392 waliojifungua salama, huku watoto 387 wakizaliwa bila shida. Lakini hatutaki kuishia hapo," alifafanua Dk. Ndakama na kuongeza:
"Kwa nguvu hii mpya kutoka PSSSF, tumejiwekea lengo la kuhakikisha akina mama 500 wanajifungua salama ifikapo mwaka wa fedha 2025/2026. Hii ni hatua kubwa sana kwetu."
Kizimkazi Yapongeza Muungano wa Vitendo
Vuka maji hadi visiwani Zanzibar, katika Kituo cha Afya Kizimkazi, Mkoa wa Kusini Unguja, hali ilikuwa ni hiyo hiyo ya shukrani. Mkuu wa Wilaya ya Kusini Unguja, Bw. Othman Maulid, ameuona msaada huo kama kiunganishi cha damu ya udugu kati ya taasisi za Muungano na wananchi wa visiwani.
"Serikali zetu mbili (SMZ na SMT) zina lugha moja tu linapokuja suala la afya: Uboreshaji wa miundombinu. Ili nchi ipate maendeleo, lazima nguvukazi iwe na afya njema. Kitendo cha PSSSF kurejesha kile wanachama wanachochangia kwa namna hii ya vifaa tiba, ni uzalendo uliotukuka," alisema Mkuu huyo wa Wilaya kwa hisia kali.
Naye Daktari Dhamana wa Wilaya ya Kusini Unguja (DMO), Mohammed Mtumwa Mnyimbi, hakuificha furaha yake, akisema kuwa vifaa hivyo vilikuwa vinahitajika kama 'njuka' jangwani.
"Huu ni mfano wa kuigwa. Vifaa hivi vitaboresha huduma zetu kwa kiasi kikubwa sana. Tunatoa wito kwa mashirika mengine, msiwaache PSSSF wapambane peke yao, igeni mfano huu ili tuiokoe jamii yetu," alisisitiza Dk. Mnyimbi.
Tukio hili la PSSSF linakumbusha umuhimu wa sekta ya hifadhi ya jamii kujikita zaidi katika kutatua changamoto za kijamii, kwani afya bora ya mwananchi ndiyo uhai wa mifuko hii. Uwekezaji huu wa Shilingi Milioni 55 si fedha tu, bali ni dhamana ya uhai kwa mamia ya akina mama na watoto watakaonufaika na huduma bora za afya.