Mhandisi Faustine Malya (44), anayekabiliwa na tuhuma za kujipatia zaidi ya Shilingi milioni 300 kutoka taasisi mbalimbali za serikali kwa njia ya udanganyifu, ameiambia mahakama kuwa hawezi kuendelea na usikilizwaji wa kesi yake kwa sasa. Alidai kuwa bado hajapona kikamilifu afya yake ya akili na ana hofu kuwa akili yake inaweza "kufyatuka" wakati wowote.
Madai hayo ya Malya yalitolewa juzi mbele ya Hakimu Mkazi wa Mahakama ya Hakimu Mkazi Kinondoni, Dar es Salaam, Bwana Amos Rweikiza, wakati kesi hiyo ilipokuwa inatajwa kwa ajili ya kusikilizwa kwa mashahidi wa upande wa Jamhuri.
"Siwezi kuendelea na kesi kwa sababu ya hali yangu ya kiafya. Cheti hiki hapa (akionyesha) ni halisi, na nakala yake pia ni kweli. Naendelea vizuri tofauti na awali ambapo nilikuwa napiga watu. Hata hapa kichwa kinaweza kikacheza na akili ikatoka," alidai Malya.
Aliongeza, "Nilipokuwa gerezani, nilikuwa napiga wenzangu hadi nikawekwa kwenye chumba maalum. Kwa hiyo, mimi na daktari ndio tunajua hali halisi ya akili yangu."
Wakati huohuo, mawakili wa washtakiwa wengine, Peter Shapa na Pharis Mshana, pia waligoma kuendelea na usikilizwaji wa kesi hiyo. Walidai kuwa wanataka haki itendeke kwa kila upande kwa kukaa kwanza na wateja wao kabla ya kuendelea.
Akijibu hoja hizo, Wakili wa Serikali, Burton Mayage, akisaidiwa na Janeth Kimambo, alidai kuwa hoja za washtakiwa hazina mashiko ya kuahirisha kesi hiyo. Alisema kuwa washtakiwa walikuwa na muda mrefu wa kutafuta mawakili tangu kesi ilipoahirishwa mara ya mwisho mnamo Machi 28, 2025.
Alidai kuwa Wakili Mshana alikuwa na jukumu la kufuatilia mwenendo wa kesi mahakamani ili kujua kinachoendelea. Aliongeza kuwa hakuna sababu ya kutokuendelea na usikilizwaji kwa sababu shahidi amefika mahakamani mara ya tatu lakini bado hajatolea ushahidi wake.
Kuhusu hoja ya Malya kuwa hana wakili, Wakili Mayage alidai kuwa hiyo ni mbinu ya kuchelewesha kesi. Alisema kuwa ripoti ya daktari inaonyesha kuwa afya ya akili ya mshtakiwa imetengemaa, na kilichobaki ni matibabu ya nje ya kuzungumza na wanasaikolojia.
"Tathmini yake ya afya ya akili inaendelea kuimarika, kwa hiyo hana sababu ya msingi ya kesi hii kuahirishwa. Tunaomba tuendelee na usikilizwaji kwa sababu ni mara ya tatu shahidi anarudi bila kutoa ushahidi," alisisitiza Wakili Mayage.
Baada ya kusikiliza hoja za pande zote, Hakimu Rweikiza alitoa amri kwamba washtakiwa wote wanapaswa kuwepo mahakamani Mei 13, 2025, na kesi itasikilizwa bila kuahirishwa tena. Alisema kuwa amezingatia pia hoja za upande wa utetezi katika kutoa uamuzi huo.