Bodi ya Nishati Vijijini (REB) imetoa sifa kemkem kwa uongozi wa Gereza Kuu la Arusha kufuatia hatua yao ya kuweka kipaumbele katika matumizi ya teknolojia za nishati safi kwa ajili ya kuandaa milo ya wafungwa zaidi ya 700. Hii ni tofauti kabisa na hali ilivyokuwa awali ambapo matumizi ya kuni na mkaa yalikuwa yakichukua nafasi kubwa, takriban asilimia 100.
Akizungumza baada ya kufanya ziara gerezani hapo tarehe 16 Mei, 2025, Balozi Radhia Msuya, mjumbe wa Bodi ya REB, alisema bodi imefurahishwa mno na jitihada zilizofanywa na Gereza hilo kutekeleza agizo la Rais Dk. Samia Suluhu Hassan. Rais Samia alitoa maelekezo mwezi Novemba, 2023, akitaka taasisi zote zinazohudumia zaidi ya watu 100 kuachana na matumizi ya nishati zinazochafua mazingira (kuni na mkaa) ili kupunguza ukataji miti na uharibifu wa mazingira.
Balozi Msuya alieleza, "Tumetembelea hapa Gereza Kuu Arusha kujionea hali halisi; tumeona wanatumia kuni mbadala, maarufu kama 'Rafiki Briquette', pamoja na gesi ya majumbani (LPG). Jambo zuri zaidi ni kwamba Mradi wa REA na Magereza unatoa fursa ya kuwezesha upatikanaji wa mashine za kutengeneza kuni hizo mbadala zinazotokana na mabaki ya mazao ya shambani, ambayo yanapatikana kwa wingi katika magereza mengi nchini."
Baada ya kujionea miundombinu mipya ya nishati safi gerezani hapo, wajumbe wa bodi walisema wameridhishwa na hatua hizo. Waliongeza kuwa jitihada hizi ni muhimu sana katika kufikia lengo la agizo la Rais Samia, ambapo Magereza yote Tanzania Bara yatanufaika na ruzuku ya shilingi bilioni 35 kutoka serikalini, kupitia REA, kwa ajili ya kutekeleza miradi mbalimbali ya nishati safi ya kupikia. Fedha hizi zinalenga kuleta mapinduzi makubwa katika sekta ya upishi gerezani na kulinda mazingira.
Kwa upande wake, Mkuu wa Gereza Kuu Arusha, ACP Charles Mihinga, alitoa shukrani za dhati kwa ushirikiano mzuri uliopo kati yao na REA. Alieleza kuwa hapo awali walikumbana na changamoto nyingi, ikiwa ni pamoja na kuandaa chakula kwa muda mrefu na hatari kwa afya za wapishi kutokana na moshi mwingi uliotokana na kuni. Aidha, kiasi kikubwa cha kuni kilikuwa kikitumika.
"Kwa sasa tunatumia mkaa mbadala (Rafiki Briquettes) ambao kuni zake zinapatikana hapa hapa Arusha, pamoja na gesi ya kupikia (LPG). Tumefungiwa mtungi mkubwa wa gesi wenye uwezo wa tani 3, jambo ambalo limerahisisha sana kazi na kuboresha mazingira ya kazi," alisema ACP Mihinga.
Mapema, Meneja Usaidizi wa Kiufundi kwa Waendelezaji Miradi kutoka REA, Mhandisi Emanuel Yesaya, alifafanua kuwa REA ilisaini mkataba na Jeshi la Magereza kwa lengo la kutoa ruzuku itakayowezesha kuboresha miundombinu ya nishati safi ya kupikia katika magereza yote ya Tanzania Bara. Mradi huu mpana unajumuisha ujenzi wa miundombinu ya gesi asilia, mitambo ya biogas, miundombinu ya gesi ya LPG, usambazaji wa mitungi mingi ya gesi na majiko yake kwa watumishi, pamoja na usambazaji wa mkaa mbadala na mashine za kuutengeneza. Pia, mafunzo yanatolewa kwa watumishi wa magereza kuhusu matumizi sahihi ya nishati safi.