Mkuu wa Mkoa wa Shinyanga, Mboni Mhita, ametoa agizo kali kwa wafanyabiashara wote mkoani humo, akisisitiza umuhimu wa kuweka vitambuzi vya moto (smoke detectors) na vizima moto (fire extinguishers) katika maeneo yao ya biashara. Agizo hili linatokana na hatua za kujikinga na majanga ya moto ambayo yamekuwa yakisababisha hasara kubwa za mali na kudidimiza uchumi wa wafanyabiashara.
Mhita alibainisha haya wakati akifanya ukaguzi wa athari za janga la moto lililotokea jana usiku, majira ya saa tatu, katika mtaa wa Igalilimi, Kata ya Kahama Mjini. Katika tukio hilo la kusikitisha, kati ya maduka 13, maduka sita (6) yameungua kabisa huku saba (7) yakiokolewa.
Kiongozi huyo alisema, kumekuwa na matukio kadhaa ya moto katika masoko na majengo ya biashara, ambayo mara nyingi yanatokana na uzembe na ukosefu wa vifaa vya tahadhari. Alikemea utamaduni huo, akisema: "Tuwe na utamaduni wa kujikinga kabla ya majanga kutokea. Wafanyabiashara wote wahakikishe majengo yao yana vifaa vya kutambua moto mapema pamoja na vizima moto. Hii itasaidia kupunguza hasara na kulinda maisha ya wananchi wetu." Kauli hii inabeba ujumbe kwamba "Kinga ni bora kuliko tiba" na kwamba majanga mengi ya moto ni ya kudhibitika kirahisi.
Mhita alielekeza mamlaka husika, zikiwemo Halmashauri na Jeshi la Zima Moto, kuendelea kutoa elimu ya kutosha juu ya majanga ya moto na jinsi ya kudhibiti, akisisitiza kuwa wale ambao wameweka vifaa vya tahadhari huwa hawaingii kwenye majanga ya namna hiyo.
Akithibitisha chanzo cha janga, Kaimu Kamanda wa Jeshi la Zimamoto na Uokoaji Mkoa wa Shinyanga, ASF Fatma Sato, alisema walifika eneo la tukio kwa wakati na kuzima moto kwa kushirikiana na wananchi. Alibainisha kuwa moto ulikuwa mkubwa kutokana na maduka kuwa na vitu vinavyowaka haraka kama magodoro, vitambaa, nguo na maboksi, huku chanzo cha moto kikitajwa kuwa ni hitilafu ya umeme iliyotokea kwenye duka moja.
Kwa upande wa ulinzi wa mali, Kamanda wa Polisi Mkoa wa Shinyanga, SCAP Janeth Magomi, alisema walifika haraka kuhakikisha wanalinda mali za wamiliki wa maduka zisiibiwe na wananchi. Alisema wamefanikiwa kwa kiwango kikubwa kulinda mali hadi moto ulipozimwa.