Mwendesha pikipiki, anayejulikana kama bodaboda, Mhochi Joseph (29), mkazi wa Kitangiri, Ilemela mkoani Mwanza, ameripotiwa kupoteza maisha baada ya kushambuliwa. Inadaiwa kuwa Joseph alikamatwa akifanya mapenzi na mke wa Athumani Morandi (36).
Akithibitisha kutokea kwa tukio hilo, Kamanda wa Polisi Mkoa wa Mwanza, DCP Wilbrod Mutafungwa, alipozungumza na waandishi wa habari, alisema kuwa tukio hilo la kusikitisha lilitokea Machi 21 katika mtaa wa Gaana ndani ya wilaya hiyo.
Kamanda Mutafungwa alieleza kuwa bodaboda huyo alishambuliwa sehemu mbalimbali za mwili wake kwa kitu chenye ncha kali baada ya kukutwa akilala na mke wa Morandi, ambaye ni dereva. "Jeshi la polisi lilifanya uchunguzi wa kina na kumtia mbaroni Athumani Morandi, mkazi wa Gana, ambaye anadaiwa kumfumania Mhochi akiwa amelala na mke wake. Inadaiwa kuwa Morandi alimshambulia kwa kutumia kitu chenye ncha kali sehemu mbalimbali za mwili, na chanzo cha tukio hili ni wivu wa mapenzi," alisema DCP Mutafungwa.
Katika tukio jingine lililotokea katika mkoa huo, DCP Mutafungwa alisema kuwa jeshi la polisi linamshikilia Doto Marco (18), mkazi wa Butonga wilayani Sengerema, kwa tuhuma za kuhusika na mauaji ya Eliyas John (18). Kamanda Mutafungwa alifafanua kuwa Marco anadaiwa kumuua John kwa kumchoma kwa kitu chenye ncha kali sehemu ya kifuani. Tukio hilo lilitokea Machi 23 majira ya saa nne usiku katika mtaa na kisiwa cha Kome. "Kulizuka mabishano makali kati yao ambayo yalisababisha ugomvi. Inadaiwa kuwa Marco alikasirika sana na kumchoma mwenzake. Mtuhumiwa tayari amefanyiwa mahojiano, na mara baada ya uchunguzi kukamilika, hatua za kisheria zitachukuliwa dhidi yake," aliongeza DCP Mutafungwa.