Kampuni ya Mabasi Yaendayo Haraka (UDART) imethibitisha kutokea kwa tukio la kusikitisha mnamo Februari 25, 2025, ambapo abiria mmoja alishambulia wafanyakazi wa kampuni hiyo waliokuwa katika majukumu yao huko Kituo cha Kimara Temboni.
Akizungumza kwa njia ya simu na Nipashe Digital, Ofisa Mawasiliano wa UDART, Gabriel Katanga, alifafanua kuwa chanzo cha vurugu hizo kilikuwa ni kitendo cha abiria mmoja kujaribu kuvunja utaratibu wa kupanda mabasi kwa kufuata foleni. Kitendo hiki kilizua mzozo kati yake na abiria wengine waliokuwa wakisubiri kwa nidhamu huduma hiyo.
"Wafanyakazi wetu waliona ni wajibu wao kumuelekeza abiria huyo kufuata utaratibu uliowekwa wa kupanga foleni kama abiria wengine. Lakini kwa bahati mbaya, abiria huyo alikaidi na badala yake aliamua kuwashambulia wafanyakazi wetu," alisema Katanga kwa masikitiko.
Kufuatia shambulio hilo, wafanyakazi wawili wa UDART walipata majeraha. Mmoja alijeruhiwa mkononi, huku mwingine akipata majeraha katika sehemu mbalimbali za mwili. Bwana Katanga aliongeza kuwa wafanyakazi hao walipatiwa huduma ya kwanza na walikuwa wakiendelea kupokea matibabu zaidi.
Katanga alifahamisha kuwa UDART imechukua hatua za kisheria kwa kuripoti tukio hilo kwenye kituo cha polisi. Tayari jalada la uchunguzi limefunguliwa kwa kumbukumbu namba KIM/RB/513/025, likihusu kosa la shambulio la mwili. Polisi wanaendelea na uchunguzi ili kubaini undani wa tukio hilo na hatua gani za kisheria zinapaswa kuchukuliwa dhidi ya mtuhumiwa.
Tukio hili la kusikitisha limeibua tena mjadala kuhusu usalama wa wafanyakazi wanaohudumu katika sekta ya usafiri wa umma nchini Tanzania. Wadau mbalimbali wamehimiza kuchukuliwa kwa hatua madhubuti ili kuhakikisha kuwa utaratibu wa utoaji huduma unaheshimiwa na abiria wote, na kwamba wafanyakazi wanalindwa dhidi ya vitendo vya ukatili wanapokuwa kazini. Inasisitizwa kuwa ni muhimu kwa abiria kuwa na uvumilivu na kufuata sheria na taratibu zilizowekwa ili kuepusha matukio kama haya ambayo yanaweza kusababisha madhara kwa watu na mali.